تعلیم اور صحت کیلئے اربوں روپے مختص، متعدد ادویات کے خام مال پر کسٹمز ڈیوٹی ختم
وفاقی حکومت نے آئندہ مالی سال کے بجٹ میں صحت عامہ کیلئے 25.1 ارب روپے، ہائر ایجوکیشن کیلئے 46 ارب روپے اور تعلیم کے شعبے کیلئے 26.3 ارب روپے مختص کرنے کا اعلان کیا ہے۔
وزیر خزانہ محمد اورنگزیب نے کہا کہ انسانی ترقی کے شعبوں میں سرمایہ کاری حکومت کی ترجیحات میں شامل ہے اور تعلیم و صحت کے منصوبوں کیلئے فنڈز میں اضافہ کیا جا رہا ہے۔
وزیر خزانہ محمد اورنگزیب نے اعلان کیا کہ حکومت ’نیشنل ٹیرف پالیسی 30-2025 کے تحت کینسر اور دیگر بیماریوں کے علاج میں استعمال ہونے والی ادویات کی مقامی تیاری کے لیے ایک اہم سہولت متعارف کرا رہی ہے۔
محمد اورنگزیب نے بتایا کہ کینسر اور دیگر امراض کی ادویات کی مقامی پیداوار میں استعمال ہونے والی 100 سے زیادہ اقسام کے خام مال پر عائد کسٹمز ڈیوٹی مکمل طور پر ختم کی جا رہی ہے۔
اُن کا اس بات پر زور دیتے ہوئے مزید کہنا تھا کہ کینسر جیسے موذی امراض نہ صرف مریضوں بلکہ ان کے خاندانوں پر بھی شدید مالی اور جذباتی بوجھ ڈال دیتے ہیں، جسے کم کرنے کے لیے عملی اقدامات ناگزیر ہیں۔
