برآمدات میں اضافہ معاشی خود انحصاری کے لیے ناگزیر ہے: احسن اقبال

وفاقی وزیر برائے منصوبہ بندی و ترقی احسن اقبال نے کہا ہے کہ پاکستان کی برآمدات میں اضافہ معاشی خود انحصاری کے حصول اور غیر ملکی امداد پر انحصار کم کرنے کے لیے انتہائی ضروری ہے۔

ریڈیو پاکستان کے مطابق، لاہور میں صحافیوں سے گفتگو کرتے ہوئے احسن اقبال نے کہا کہ صنعت قومی معیشت کی ریڑھ کی ہڈی ہے اور اب اس شعبے میں ترقی کے آثار نظر آ رہے ہیں۔

وفاقی وزیر کا کہنا تھا کہ پاکستان کے مثبت معاشی اشاریوں کا عالمی برادری بھی اعتراف کر رہی ہے۔

احسن اقبال نے پاکستانی مصنوعات کے معیار کو بہتر بنانے اور بین الاقوامی منڈیوں تک ان کی رسائی بڑھانے کی اہمیت پر زور دیا۔ ان کے مطابق، برآمدات میں اضافے سے ملک کی معاشی خود مختاری کو مضبوط بنانے اور بیرونی امداد پر انحصار کم کرنے میں مدد مل سکتی ہے۔