وزیراعظم شہباز شریف کی دانش اسکولوں کی جلد تکمیل کی ہدایت، مظفرآباد میں ٹیک کیمپس قائم کرنے کا اعلان

وزیراعظم شہباز شریف نے متعلقہ حکام کو ہدایت کی ہے کہ ملک بھر میں قائم کیے جانے والے دانش اسکولوں کی تعمیراتی منصوبوں کو تیز رفتاری سے مکمل کیا جائے تاکہ طلبہ کو جلد از جلد معیاری تعلیمی سہولیات فراہم کی جا سکیں۔

اسلام آباد میں دانش اسکولوں اور دانش یونیورسٹی کے قیام سے متعلق اجلاس کی صدارت کرتے ہوئے وزیراعظم نے کہا کہ ملک بھر میں دانش اسکولوں اور اسلام آباد میں دانش یونیورسٹی کا قیام قوم کے روشن مستقبل میں بہترین سرمایہ کاری ہے۔ انہوں نے مظفرآباد میں دانش یونیورسٹی کے ٹیک کیمپس کے قیام کی بھی ہدایت دی۔

وزیراعظم نے کہا کہ دانش اسکولوں کے تعمیراتی ڈیزائن میں متعلقہ علاقوں کی ثقافت اور روایات کی عکاسی ہونی چاہیے۔ انہوں نے اس بات پر زور دیا کہ دانش اسکولوں اور دانش یونیورسٹی میں تدریسی و غیر تدریسی عملے کی بھرتی مکمل شفافیت اور میرٹ کی بنیاد پر کی جائے۔

شہباز شریف نے وزارتِ وفاقی تعلیم و پیشہ ورانہ تربیت کی ٹیم کی جانب سے دانش اسکولوں کی تعمیر میں ہونے والی تیز رفتار پیش رفت کو سراہا۔

اجلاس کو بریفنگ میں بتایا گیا کہ خیبر پختونخوا، سندھ، بلوچستان، گلگت بلتستان، آزاد جموں و کشمیر اور اسلام آباد میں مجموعی طور پر 27 دانش اسکولوں پر کام جاری ہے، جبکہ اسلام آباد میں دانش یونیورسٹی کی تعمیر بھی تیزی سے جاری ہے۔

اجلاس کو آگاہ کیا گیا کہ اسلام آباد کے علاقے کوری میں قائم دانش اسکول مکمل ہو چکا ہے اور وہاں تعلیمی سرگرمیوں کا باقاعدہ آغاز بھی ہو گیا ہے۔

مزید بتایا گیا کہ باغ، بھمبر، سلطان آباد، گانچھے اور استور میں زیر تعمیر دانش اسکول تکمیل کے آخری مراحل میں ہیں، جہاں آئندہ سال اپریل سے تدریسی سرگرمیاں شروع ہونے کی توقع ہے۔

بریفنگ میں یہ بھی بتایا گیا کہ دانش یونیورسٹی کے لیے فیکلٹی ممبران کی بھرتی کا عمل شروع ہو چکا ہے، جبکہ یونیورسٹی میں تعلیمی سرگرمیوں کا آغاز 2027 میں ہوگا۔ ملک بھر، خصوصاً پسماندہ علاقوں سے تعلق رکھنے والے طلبہ کو میرٹ کی بنیاد پر داخلے دیے جائیں گے۔