گوگل کے تعاون سے پنجاب کے ایک لاکھ سے زائد طلبہ کو مفت سرٹیفکیشن کورسز کرائے جائیں گے، وزیر اعلیٰ
گوگل کی جانب سے پنجاب میں طلبہ کیلئے اہم اعلان کردیا گیا جبکہ وزیراعلیٰ پنجاب مریم نواز کی جانب سے بھی بڑی خوشخبریاں سنا دی گئیں۔
لاہور میں مریم نواز شریف کی زیر صدارت منعقدہ خصوصی اجلاس میں صوبے کے تعلیمی نظام میں بہتری کیلئے متعدد اہم فیصلے کیے گئے، جن میں طلبہ کیلئے سکالرشپس، مفت آئی ٹی کورسز اور جدید سہولیات کی فراہمی شامل ہے۔
اجلاس میں فیصلہ کیا گیا کہ گوگل کے تعاون سے پنجاب کے ایک لاکھ سے زائد طلبہ کو مفت سرٹیفکیشن کورسز کرائے جائیں گے، جن کی فیس 400 سے 1000 ڈالر تک ہوگی، ان کورسز میں سائبر سکیورٹی، آرٹیفیشل انٹیلیجنس، بزنس انٹیلی جنس سمیت دیگر جدید شعبے شامل ہوں گے، جن کا دورانیہ تین سے چھ ماہ ہوگا۔
وزیراعلیٰ نے کالجز ایجوکیشن کی سٹینڈرڈ رائزیشن کا اصولی فیصلہ کرتے ہوئے صوبے کے 166 سرکاری کالجز میں جدید آئی ٹی لیبز کے قیام کی منظوری بھی دی، اس کے علاوہ پہلی مرتبہ کالجز میں پرنسپلز، اساتذہ اور اداروں کیلئے کارکردگی کے پیمانے (کے پی آئیز) مقرر کرنے کا فیصلہ کیا گیا، جبکہ سرکاری یونیورسٹیوں کے وائس چانسلرز کی کارکردگی بھی انہی پیمانوں کے تحت جانچی جائے گی۔
اجلاس میں ہونہار سکالرشپ پروگرام کو مزید وسعت دیتے ہوئے پنجاب کی تاریخ میں پہلی بار 62 ہزار 949 طلبہ کو ایک ساتھ سکالرشپس دینے کی منظوری دی گئی، وزیراعلیٰ نے ہدایت کی کہ تمام اہل طلبہ کو بلا امتیاز وظائف فراہم کیے جائیں، اس پروگرام کے تحت مختلف مراحل میں اربوں روپے کے فنڈز مختص کیے گئے ہیں۔
مزید برآں، 29 اضلاع کے 36 کامرس کالجز کو 19 سرکاری یونیورسٹیوں سے منسلک کرنے کا فیصلہ کیا گیا ہے، جہاں بزنس، اکاؤنٹنگ، فنانس، بینکنگ، آئی ٹی اور ای کامرس سمیت 14 مختلف بی ایس پروگرامز پڑھائے جائیں گے۔
وزیراعلیٰ نے طلبہ کیلئے الیکٹروبس سہولت کی منظوری بھی دی، جبکہ لیپ ٹاپ سکیم کے دوسرے مرحلے میں خصوصی طلبہ اور اقلیتی طلبہ کو بھی اوپن میرٹ پر شامل کرنے کی ہدایت جاری کی، اس سے قبل پہلے مرحلے میں 38 ہزار سے زائد طلبہ مستفید ہو چکے ہیں جبکہ دوسرے مرحلے کیلئے 1 لاکھ 42 ہزار درخواستیں موصول ہوئیں۔
اجلاس میں تعلیمی کارکردگی کا جائزہ لیتے ہوئے بتایا گیا ہے کہ گریڈ 8 کے سسمنٹ امتحانات میں 9 لاکھ 94 ہزار طلبہ نے شرکت کی، جن میں طالبات کی کامیابی کا تناسب 92 فیصد جبکہ طلباء کا 84 فیصد رہا، وزیراعلیٰ نے پہلی تین پوزیشنیں طالبات کے حاصل کرنے پر اطمینان کا اظہار کیا۔
اس موقع پر مریم نواز شریف نے سرگودھا سمیت دیگر علاقوں کے تعلیمی اداروں میں بہتری کیلئے جنگی بنیادوں پر اقدامات کرنے کی ہدایت بھی جاری کی۔
