وزیراعظم شہباز شریف نے اسلام آباد میں دانش اسکول کا افتتاح کر دیا

وزیراعظم شہباز شریف نے اسلام آباد میں دانش اسکول کا افتتاح کر دیا۔ اس موقع پر خطاب کرتے ہوئے وزیراعظم نے کہا کہ حکومت ملک کے باصلاحیت نوجوانوں کو تعلیم کے یکساں مواقع فراہم کرکے انہیں بااختیار بنانے کے لیے پُرعزم ہے۔

وزیراعظم شہباز شریف کا کہنا تھا کہ دانش اسکولوں سے فارغ التحصیل ہونے والے طلبہ کی کامیابی کی کہانیاں دل کو چھو لینے والی اور دوسروں کے لیے باعثِ تحریک ہیں۔

انہوں نے کہا کہ ملک بھر میں لاکھوں ذہین طلبہ و طالبات مالی مشکلات کے باعث اپنی صلاحیتوں کو بروئے کار لانے کے مواقع سے محروم رہ جاتے ہیں، حالانکہ ان میں پاکستان کو دنیا کی تیزی سے ترقی کرنے والی اقوام میں شامل کرنے کی بھرپور صلاحیت موجود ہے۔

وزیراعظم نے دانش اسکولوں کے قیام کے پس منظر میں 2010ء کے وژن کا ذکر کرتے ہوئے کہا کہ اس منصوبے کا مقصد ملک کے ہر کونے، بشمول آزاد جموں و کشمیر اور گلگت بلتستان، سے تعلق رکھنے والے مستحق طلبہ کو اعلیٰ معیار کی تعلیم فراہم کرنا تھا، تاکہ وہ اشرافیہ کے تعلیمی اداروں کے ہم پلہ سہولیات سے مستفید ہو سکیں۔

انہوں نے اس بات پر زور دیا کہ معیاری تعلیم ہر باصلاحیت بچے کا بنیادی حق ہے اور اس حق کا تعلق کسی بھی صورت اس کے معاشی یا سماجی پس منظر سے نہیں ہونا چاہیے۔

وزیراعظم نے اس عزم کا اعادہ کیا کہ حکومت مستحق اور ذہین بچوں کو معیاری تعلیم کے مساوی مواقع فراہم کرنے کے لیے اقدامات جاری رکھے گی۔