کسانوں کو سستی کھاد، بیج اور تکنیکی مہارت کی فراہمی حکومت کی اولین ترجیح ہے ، وزیراعظم

وزیراعظم شہباز شریف نے کہا ہے کہ کسانوں کو سستی کھاد، معیاری بیج، جدید مشینری اور آلات فراہم کرنے کے ساتھ پانی کے مؤثر استعمال کے لیے تکنیکی مہارت فراہم کرنا حکومت کی اولین ترجیح ہے۔

وہ آج اسلام آباد میں قومی زراعت اور غذائی تحفظ کونسل کے پہلے اجلاس کی صدارت کر رہے تھے۔

وزیراعظم نے کہا کہ زراعت ملکی معیشت کی ریڑھ کی ہڈی ہے اور اس میں پاکستان کو مختصر مدت میں اقتصادی ترقی کی راہ پر گامزن کرنے کی صلاحیت موجود ہے۔

انہوں نے اس بات پر زور دیا کہ بالخصوص چھوٹے اور درمیانے درجے کے کسانوں کے لیے، فصلوں کی منصفانہ قیمتوں کو یقینی بنانا حکومت کی اولین ترجیح ہے۔

انہوں نے کہا کہ وفاقی حکومت زرعی شعبے کی ترقی کے لیے صوبوں کو ہر ممکن تعاون فراہم کرے گی۔