حکومت پائیدار معاشی ترقی کے لیے اصلاحاتی ایجنڈے پر عمل پیرا ہے، وزیراعظم شہباز شریف
وزیراعظم شہباز شریف نے کہا ہے کہ حکومت معیشت کو مستحکم بنانے اور پائیدار معاشی ترقی کے حصول کے لیے اپنے اصلاحاتی ایجنڈے پر بھرپور انداز میں عمل کر رہی ہے۔
انہوں نے یہ بات اسلام آباد میں ورلڈ بینک کے کنٹری ڈائریکٹر بولورما امگابازار کی سربراہی میں آئے ہوئے وفد سے ملاقات کے دوران کہی۔
وزیراعظم نے وفد کا خیرمقدم کرتے ہوئے پاکستان اور ورلڈ بینک کے درمیان دیرینہ شراکت داری کو سراہا اور ملک کی سماجی و معاشی ترقی میں ادارے کے کردار کی تعریف کی۔ انہوں نے پاکستان کی ترقی کے سفر میں ورلڈ بینک کی مسلسل معاونت پر شکریہ بھی ادا کیا۔
شہباز شریف نے کہا کہ پاکستان کا آئینی وفاقی ڈھانچہ، صوبائی خودمختاری اور وفاق و صوبوں کے درمیان قریبی تعاون اور مشاورت ملک کی ترقی اور استحکام کے لیے بنیادی اہمیت رکھتے ہیں۔
ملاقات کے دوران ورلڈ بینک کے کنٹری ڈائریکٹر نے "پاکستان میں مالیاتی وفاقیت کو مضبوط بنانے” سے متعلق رپورٹ وزیراعظم کو پیش کی اور اس کے اہم نکات سے آگاہ کیا۔
وفد نے رپورٹ میں اٹھارہویں آئینی ترمیم اور ساتویں قومی مالیاتی کمیشن (این ایف سی) ایوارڈ کے بعد پاکستان میں مالیاتی وفاقیت کے ارتقا کا جائزہ پیش کیا۔ رپورٹ میں محصولات کی وصولی، سرکاری اخراجات، وفاق اور صوبوں کے درمیان مالیاتی تعلقات، ادارہ جاتی ہم آہنگی اور عوامی وسائل کے مؤثر استعمال جیسے موضوعات کا احاطہ کیا گیا ہے۔
ورلڈ بینک نے مالیاتی نظم و ضبط کو مضبوط بنانے، وسائل کے مؤثر استعمال، عوامی خدمات کی بہتری اور وفاقی و صوبائی اداروں کے درمیان مؤثر رابطہ بڑھانے کے لیے متعدد پالیسی سفارشات بھی پیش کیں۔
وزیراعظم نے ورلڈ بینک کے جامع تجزیے اور بین الاقوامی بہترین تجربات پر مبنی تقابلی جائزے کو سراہتے ہوئے کہا کہ اس نوعیت کی رپورٹس بہتر اور مؤثر پالیسی سازی کے لیے اہم رہنمائی فراہم کرتی ہیں۔
انہوں نے رپورٹ کا تفصیلی جائزہ لینے کے لیے اعلیٰ سطحی کمیٹی تشکیل دینے کی ہدایت بھی کی۔
وزیراعظم نے کہا کہ یہ کمیٹی صوبوں سمیت تمام متعلقہ فریقوں سے مشاورت کرتے ہوئے، پاکستان کے آئینی اور وفاقی ڈھانچے کو مدنظر رکھ کر ورلڈ بینک کی سفارشات کا جائزہ لے گی تاکہ عوامی مفاد میں قابلِ عمل تجاویز پر غور کیا جا سکے۔
