آزاد جموں و کشمیر: تیسرے مرحلے کے انتخابات کی انتخابی مہم آج رات ختم ہوگی
آزاد جموں و کشمیر میں عام انتخابات کے تیسرے مرحلے کے لیے انتخابی مہم آج رات 12 بجے اختتام پذیر ہو جائے گی۔
الیکشن کمیشن آزاد جموں و کشمیر کے ترجمان کے مطابق تیسرے مرحلے میں ضلع باغ کے تین اور ضلع حویلی کے ایک حلقے میں پولنگ ہوگی۔
ترجمان نے بتایا کہ ان چار حلقوں میں پولنگ پیر کے روز ہوگی۔
الیکشن کمیشن نے تمام امیدواروں اور سیاسی جماعتوں کو ہدایت کی ہے کہ وہ انتخابی قوانین، ضابطۂ اخلاق اور کمیشن کی جانب سے جاری کردہ ہدایات پر سختی سے عمل کریں۔
الیکشن کمیشن کے ترجمان نے خبردار کیا کہ انتخابی قوانین یا ضابطۂ اخلاق کی خلاف ورزی کی صورت میں متعلقہ قوانین کے تحت سخت قانونی کارروائی کی جائے گی۔
یوں تیسرے مرحلے کے لیے انتخابی مہم کے اختتام کے بعد باغ اور حویلی کے چار حلقوں میں امیدواروں اور سیاسی جماعتوں کی انتخابی سرگرمیاں رک جائیں گی، جبکہ ووٹرز پیر کے روز اپنا حقِ رائے دہی استعمال کریں گے۔
