ٹی ٹوئنٹی ورلڈ کپ، افغانستان پاپوا نیو گنی کو شکست دیکر سپر ایٹ مرحلے میں پہنچ گیا
ٹی ٹوئنٹی ورلڈ کپ کے 29 ویں میچ میں افغانستان نے پاپوا نیو گنی کو 7 وکٹ سے شکست دے دی۔اس جیت کے ساتھ افغانستان کی ٹیم نے گروپ سی سے سپر ایٹ مرحلے کیلئے کوالیفائی کرلیا ہے جبکہ ویسٹ انڈیز اس گروپ سے پہلے ہی سپر ایٹ مرحلے میں پہنچ چکی ہے، گروپ میں موجود نیوزی لینڈ کی ٹیم پہلی مرتبہ ٹی ٹوئنٹی ورلڈ کپ کا پہلا مرحلے عبور کرنے میں ناکام رہی ہے۔
گروپ سی میں شامل دونوں ٹیموں کے درمیان میچ تاروبا کے برائن لارا کرکٹ اسٹیڈیم میں کھیلا گیا جہاں افغانستان نے ٹاس جیت کر فیلڈنگ کا فیصلہ کیا تھا۔پاپوا نیو گینی کی ٹیم 19 عشاریہ 5 اوورز میں 95 رنز بناکر آل آؤٹ ہوگئی۔کپلن ڈوریگا 27، ایلئی ناؤ 13 اور ٹونی اورا 11 رنز بناکر آؤٹ ہوئے، اس کے علاوہ کوئی کھلاڑی ڈبل فیگر میں نہیں پہنچ سکا۔
بعدازاں 96 رنز کا ہدف افغان بیٹرز نے 15.1 اوورز میں 3 وکٹ کے نقصان پر پورا کرلیا۔اس میچ سے قبل افغانستان نے اپنے گروپ میں 2 میچز کھیلے تھے اور دونوں میں کامیابی حاصل کی تھی۔افغانستان نے اپنے پہلے میچ میں یوگنڈا کو 125 رنز اور دوسرے میچ میں نیوزی لینڈ کو 84 رنز سے شکست دی تھی۔دوسری طرف پاپوا نیو گنی کو ایونٹ کے دونوں میچز میں شکست کا سامنا رہا تھا، پہلے میچ میں انہیں ویسٹ انڈیز اور دوسرے میچ میں یوگنڈا کے ہاتھوں شکست ہوئی تھی۔
