ٹی ٹوئنٹی ورلڈ کپ،دفاعی چیمپئن ویسٹ انڈیز کی پہلی جیت
ٹی ٹوئنٹی ورلڈ کپ کے میچ میں ویسٹ انڈیز نے سنسنی خیز مقابلے کے بعد بنگلہ دیش کو 3رنز سے شکست دے دی۔شارجہ کرکٹ سٹیڈیم میں کھیلے گئے میچ میں بنگلہ دیش نے ٹاس جیت کر بالنگ کا فیصلہ کیا جو درست ثابت ہوا۔ویسٹ انڈیز کے اوپنرز ٹیم کو اچھا آغاز فراہم نہ کر سکے اور دونوں بلے باز کرس گیل اور ایون لوئس بالترتیب 12 اور 18 کے مجموعی سکور پر پویلین لوٹ گئے۔کرس گیل کو 4 کے انفرادی سکور پر مہدی حسن نے بولڈ کیا جبکہ ایون لوئس مستفیض الرحمنٰ کا شکار بنے۔
اس موقع پر شیمرون ہٹمائر اور روسٹن چیز نے ٹیم کو سنبھالا دینے کی کوشش کی لیکن 32 کے مجموعی سکور پر ہٹمائر کی ہمت بھی جواب دے گئی اور وہ 9 بنا کر مہدی حسن کی گیند پر کیچ آئوٹ ہوگئے۔32 رنز پر تین وکٹیں گرنے کے بعد روسٹن چیز کا ساتھ دینے کپتان کیرن پولارڈ آئے اور دونوں نے چوتھی وکٹ کے لیے 30 رنز جوڑے لیکن اس مرحلے پر انجری کے سبب پولارڈ ریٹائر ہو کر پویلین لوٹ گئے۔نئے بلے باز آندرے رسل کوئی گیند کھیلے بغیر ہی رن آئوٹ ہو کر پویلین لوٹ گئے جس کے بعد نکولس پوران کی وکٹ پر آمد ہوئی۔پوران اور روسٹن چیز نے جارحانہ کھیل پیش کرتے ہوئے 57 رنز کی شراکت قائم کی، پوران نے جارحانہ انداز اپنایا اور 22 گیندوں پر 4 چھکوں کی مدد سے 40 رنز بنائے۔اگلی ہی گیند پر شریف الاسلام نے روسٹن چیز کی اننگز کا بھی خاتمہ کردیا جنہوں نے 39 رنز بنانے کے لیے 46 گیندوں کا سہارا لیا۔آخری اوور میں بنے 19 رنز کی بدولت ویسٹ انڈیز کی ٹیم مقررہ اوورز میں 7 وکٹوں کے نقصان پر 142 رنز بنانے میں کامیاب رہی۔
بنگلہ دیش کی جانب سے مہدی حسن، مستفیض الرحمن اور شریف الاسلام نے دو ، دو وکٹیں حاصل کیں۔بنگلہ دیش نے ہدف کا تعاقب شروع کیا تو 20 کے مجموعی سکور پر مڈوکٹ پر کھڑے ہیڈن واش بنگلہ دیشی بلے باز محمد نعیم کا آسان کیچ نہ لے سکے لیکن اگلی ہی گیند پر آندرے رسل نے تجربہ کار شکیب الحسن کو چلتا کردیا۔ابھی بنگلہ دیشی ٹیم اس نقصان سے سنبھلی بھی نہ تھی کہ اگلے اوور میں جیسن ہولڈر نے محمد نعیم کی وکٹیں بکھیر دیں جو 17 رنز بنا سکے۔اس کے بعد لٹن داس کا ساتھ دینے سومیا سرکار آئے اور دونوں نے مل کر سکور کو 55 تک پہنچا دیا، ویسٹ انڈیز کو لٹن داس کو رن آئوٹ کرنے کا موقع ملا لیکن وہ اس سے فائدہ نہ اٹھا سکے۔ سکور 60 تک پہنچا تو سومیا سرکار صرف 17 رنز بنانے کے بعد عقیل حسین کی وکٹ بن گئے۔مشفیق الرحیم نے لٹن داس کے ساتھ مل کر اسکور 90 تک پہنچایا لیکن اس مرحلے پر تجربہ کار روی رامپال نے وکٹ کیپر بلے باز کی وکٹیں بکھیر دیں
۔دوسرے اینڈ سے لٹن داس نے عمدہ بیٹنگ کا سلسلہ جاری رکھا اور 44 رنز کی اننگز کھیلی لیکن جیسن ہولڈر نے بانڈری پر شاندار کیچ لے کر ان کی اننگز کا خاتمہ کردیا۔آخری اوور میں بنگلہ دیش کو فتح کے لیے 13 رنز درکار تھے لیکن آندرے رسل نے اپنے اعصاب کو قابو میں رکھتے ہوئے بنگلہ دیش کو صرف 9 رنز بنانے دیے اور اس طرح دفاعی چیمپیئن ویسٹ انڈیز نے میچ میں 3رنز سے کامیابی حاصل کر لی۔بنگلہ دیش نے مقررہ اوورز میں 5 وکٹوں کے نقصان پر 139 رنز بنائے، کپتان محموداللہ نے 31 رنز کی اننگز کھیلی لیکن ان کی یہ کاوش بھی بنگلہ دیش کو فتح دلانے کے لیے ناکافی ثابت ہوئی۔22 گیندوں پر 4 چھکوں کی مدد سے 40 رنز کی اننگز کھیلنے والے نکلوس پوران کو میچ کا بہترین کھلاڑی قرار دیا گیا۔
