ذمہ دار میڈیا پاکستان کا مثبت تشخص اجاگر کرنے میں اہم کردار ادا کرتا ہے: گیلانی

قائم مقام صدر سید یوسف رضا گیلانی نے پاکستان کا متوازن، مثبت اور تعمیری تشخص اجاگر کرنے میں ذمہ دار اور پیشہ ور میڈیا کے اہم کردار پر زور دیا ہے۔

انہوں نے ان خیالات کا اظہار اسلام آباد میں پاکستان آبزرور کے چیئرمین اور ایڈیٹر ان چیف فیصل زاہد ملک سے ملاقات کے دوران کیا، جنہوں نے آج ان سے ملاقات کی۔

ملاقات کے دوران پارلیمانی سفارت کاری اور پاکستان کا مثبت تشخص اجاگر کرنے میں میڈیا کے کردار سے متعلق امور پر بھی تبادلہ خیال کیا گیا۔

فیصل زاہد ملک نے پاکستان آبزرور کے کردار کو تسلیم کرنے پر قائم مقام صدر کا شکریہ ادا کیا اور کہا کہ اخبار دنیا بھر میں پاکستان کے قومی مفادات اور مثبت تشخص کو اجاگر کرنے کے لیے اپنا کردار جاری رکھے گا۔

اس موقع پر پاکستان آبزرور کے ڈپٹی ایڈیٹر ان چیف سعود فیصل ملک بھی موجود تھے۔