کوکو گاف نے سنسناٹی اوپن کا ٹائٹل جیت لیا

امریکی ٹینس اسٹار کوکو گاف نے ہم وطن جیسیکا پیگولا کو 6-2، 6-4 سے شکست دے کر سنسناٹی اوپن کا ویمنز ٹائٹل اپنے نام کرلیا۔

سنسناٹی اوپن کے سیمی فائنلز میں جیسیکا پیگولا نے دفاعی چیمپئن ایگا شوئنتیک کو شکست دی، جبکہ کوکو گاف نے سارا بیجلیک کو ہرا کر فائنل میں جگہ بنائی تھی۔ اس طرح 56 سال بعد سنسناٹی اوپن کی ویمنز فائنل میں دو امریکی کھلاڑی مدمقابل آئیں۔

اس سے قبل آخری مرتبہ 1970 میں دو امریکی خواتین نے سنسناٹی کے فائنل میں مقابلہ کیا تھا، جب روزی کاسلز نے نینسی رچی کو شکست دی تھی۔

فائنل میں کوکو گاف نے شاندار آغاز کرتے ہوئے پہلے سیٹ میں 5-0 کی برتری حاصل کی اور 6-2 سے سیٹ جیت لیا۔ دوسرے سیٹ میں پیگولا نے مقابلے میں واپسی کی کوشش کی اور اسکور 4-5 تک پہنچایا، تاہم گاف نے اگلا گیم جیت کر میچ اپنے نام کرلیا۔ گاف نے چھ میں سے پانچ بریک پوائنٹس کامیابی سے حاصل کیے۔

یہ سنسناٹی میں گاف کا دوسرا ٹائٹل ہے۔ وہ اس سے قبل 2023 میں بھی یہاں چیمپئن بن چکی ہیں۔

گاف اور پیگولا کے درمیان باہمی مقابلوں کا ریکارڈ اب 5-5 سے برابر ہوگیا ہے۔ گاف نے میچ کے بعد پیگولا اور ان کی ٹیم کے لیے احترام کا اظہار کرتے ہوئے انہیں اپنے کیریئر کے ابتدائی دور میں تعاون کرنے والے کھلاڑیوں میں شمار کیا۔

قابلِ ذکر بات یہ ہے کہ گاف نے 2023 میں سنسناٹی اوپن جیتنے کے بعد اسی سال یو ایس اوپن میں اپنا پہلا گرینڈ سلیم ٹائٹل بھی حاصل کیا تھا۔ پیگولا نے کہا کہ پراعتماد گاف یو ایس اوپن میں خطرناک ثابت ہوسکتی ہیں۔