بھارتی حکومت کا غیر ریاستی باشندوں کو جموں کشمیر کی ڈومیسائل دینے کا فیصلہ بین الاقوامی قوانین اور اقوام متحدہ کی قراردادوں کی صریح خلاف ورزی ہے، عبدالصمد انقلابی
یہ اقدام جموں کشمیر کی آبادیاتی ساخت کو تبدیل کرنے کی ایک مذموم کوشش ہے، جس کا مقصد جموں کشمیر کے عوام کی شناخت اور حق خودارادیت کو ختم کرنا ہے
کل جماعتی حریت کانفرنس کے سینئر رہنما اور اسلامی تنظیم آزادی جموں کشمیر چیئرمین جناب پیر عبدالصمد انقلابی نے کہا ہے کہ بھارتی حکومت کی جانب سے غیر ریاستی باشندوں کو جموں کشمیر کی ڈومیسائل دینے کا فیصلہ بین الاقوامی قوانین اور اقوام متحدہ کی قراردادوں کی صریح خلاف ورزی ہے، یہ اقدام جموں کشمیر کی آبادیاتی ساخت کو تبدیل کرنے کی ایک مذموم کوشش ہے، جس کا مقصد جموں کشمیر کے عوام کی شناخت اور حق خودارادیت کو ختم کرنا ہے، یہ جنیوا کنونشن کے چوتھے آرٹیکل کی بھی خلاف ورزی ہے، جو جموں کشمیر میں آبادیاتی تبدیلیوں کو غیر قانونی قرار دیتا ہے۔
چیئرمین نے کہا ہے کہ جموں کشمیر میں عوامی ایکشن کمیٹی اور اتحاد المسلمین سمیت اور بھی متعدد پرامن دینی، تعلیمی، سیاسی اور سماجی جدوجہد کرنے والی تنظیموں پر پابندی لگانا غیر شرعی غیر قانونی، غیر آئنی، غیر جمہوریت اور آزادی اظہار رائے پر ایک سنگین حملہ ہے۔ ان تنظیموں نے ہمیشہ پرامن اور جمہوری طریقوں سے جموں کشمیر کے عوام کے حقوق کے لیے آواز بلند کی ہے، جموں کشمیر کے تمام دینی، روحانی، تعلیمی، سیاسی اور سماجی تنظیموں پر پابندی لگا کر بھارتی حکومت نے جموں کشمیر کے عوام کی جائز آواز کو دبانے کی کوشش کی ہے۔
چیئرمین نے کہا ہے کہ بھارتی حکومت کی طرف سے جموں کشمیر میں انسانی حقوق کی سنگین خلاف ورزیاں جاری ہیں، ماورائے عدالت قتل، جبری گمشدگیاں، تشدد اور آزادی اظہار رائے پر پابندی اور جائیدادوں کا سربمہر کرنا معمول بن چکا ہے، انسانی حقوق کی بین الاقوامی تنظیموں نے بھی اپنی رپورٹس میں ان خلاف ورزیوں کو دستاویزی شکل دی ہے۔
چیئرمین نے کہا ہے کہ کل جماعتی حریت کانفرنس بھارت پر زور دیتی ہے کہ وہ جموں کشمیر کے پرامن حل کے لیے سہہ فریقی مذاکرات شروع کرے، یہ مذاکرات پاکستان، بھارت اور جموں کشمیر کے آزادی پسند کے نمائندوں کے درمیان ہونے چاہئیں، یا جموں کشمیر کے لوگوں کو اقوام متحدہ کی نگرانی میں پر امن طور پر آزادانہ اور منصفانہ رائے شماری کے ذریعے اپنا مستقبل کا فیصلہ کرنے کا حق دیا جائے۔
چیئرمین نے کہا ہے کہ ہم عالمی برادری سے مطالبہ کرتے ہیں کہ وہ بھارتی حکومت پر دباؤ ڈالے کہ وہ جموں کشمیر میں انسانی حقوق کی خلاف ورزیوں اور ڈیموگرافی تبدیلی کو روکے اور جموں کشمیر کے عوام کے حق خودارادیت کو تسلیم کرے، اقوام متحدہ کو اپنی قراردادوں پر عمل درآمد کو یقینی بنانا چاہیے۔
چیئرمین نے کہا ہے کہ کل جماعتی حریت کانفرنس جموں کشمیر کے عوام کے عزم کا اعادہ کرتی ہے کہ وہ اپنے حق خودارادیت کے لیے اپنی پر امن جائز جدوجہد جاری وساری رکھیں گے، ہم کسی بھی دباؤ یا ظلم وجبر کے سامنے نہیں جھکیں گے۔ (ان شاء اللہ تعالیٰ)
