پاکستان اور قطر کا سٹریٹجک تعلقات کو مزید گہرا کرنے کے عزم کا اعادہ
پاکستان اور قطر نے مشترکہ اقتصادی اہداف اور علاقائی استحکام کی اہمیت پر زور دیتے ہوئے سٹریٹجک تعلقات کو مزید گہرا کرنے کے عزم کا اعادہ کیا ہے۔اس عزم کا اظہار وزیر اعظم شہباز شریف نے قطر کے امیر شیخ تمیم بن حمد الثانی سے وفود کی سطح پر بات چیت کے دوران کیا جس کے بعد دوحہ میں دو طرفہ مفادات کے وسیع سلسلے پر تبادلہ خیال کے لیے ون آن ون ملاقات ہوئی۔
رہنماؤں نے پاکستان اور قطر کے تعلقات کے تمام پہلوؤں کا جائزہ لیا، تجارت، سرمایہ کاری، توانائی اور ثقافت کے ممکنہ شعبوں میں تعاون بڑھانے کے لیے ممکنہ راہیں تلاش کیں۔دونوں رہنماؤں نے باہمی دلچسپی کے علاقائی اور بین الاقوامی امور بالخصوص اسرائیل کی طرف سے بے گناہ فلسطینیوں کے خلاف جاری نسل کشی کی جنگ اور خطے میں کشیدگی میں اضافے پر بھی تبادلہ خیال کیا۔
وزیراعظم شہباز شریف نے گزشتہ ماہ 24 تاریخ کو منعقدہ 79ویں اقوام متحدہ کی جنرل اسمبلی کے دوران قطر کے امیر کی طرف سے فلسطین کے معاملے پر اس موقف کو سراہا۔ انہوں نے فوری جنگ بندی اور انسانی امداد کی بلا تعطل فراہمی کے لیے قطر کی ثالثی کی کوششوں کو سراہا۔ وزیراعظم نے قطر کے امیر کو دورہ پاکستان کی دعوت بھی دی۔وزیر اعظم کا دورہ پاکستان اور قطر کے درمیان مسلسل مضبوط ہونے والی شراکت داری اور تعاون کو وسعت دینے میں ایک اور سنگ میل کی نشاندہی کرتا ہے۔
