تحریک انصاف نے میئر کراچی الیکشن میں غیر حاضر 11بلدیاتی نمائندوں کو پارٹی سے نکال دیا

پاکستان تحریک انصاف سندھ کے صدر حلیم عادل شیخ نے نمائندوں کے جواب غیر تسلی بخش قرار دیتے ہوئے میئر کراچی کے الیکشن میں غیر حاضر 11 پی ٹی آئی بلدیاتی نمائندوں کو پارٹی سے نکال دیا۔ حلیم عادل شیخ نے کہا کہ جوابات اطمینان بخش نہیں، ایک جیسے اسٹینو ٹائپسٹ ہیں۔انہوں نے بتایا کہ مومن آباد ٹائون کے وائس چیئرمین محمد اکبر پر پارٹی کے خلاف سازش کا بھی الزام ہے، نکالے گئے نمائندوں میں مومن آباد کے اسد اللہ، صلاح الدین، امجد علی، ملیر کے عاصم حیدر، صدر ٹائون کے اسلم خان نیازی اور موریو میر بحر کے زبیر موسیٰ بھی شامل ہیں۔انہوں نے بتایا کہ خواتین کی مخصوص نشست پر کامیاب صنوبر فرحان کو بھی پارٹی سے نکال دیا گیا ۔شاہ فیصل کالونی کے سلیمان خان، منگھوپیر کے عزیز اللہ اور لیاری کے عبدالغنی کو بھی پارٹی سے نکال دیا گیا۔