بلاول بھٹو نے وکلا کو 27فروری کے لانگ مارچ میں شرکت کی دعوت دیدی
پاکستان پیپلزپارٹی کے چیئرمین بلاول بھٹو نے وکلاء سے 27 فروری کے لانگ مارچ میں حصہ لینے کی اپیل کردی۔
بلاول بھٹو نے پیپلز لائرز فورم کے حمایت یافتہ لاہور اور ملتان بار کے نومنتخب عہدیداران کو مبارک باد دیتے ہوئے کہا کہ ملک میں آئین اور جمہوریت کے لیے وکلاء کی جدوجہد روشن باب ہے، وکلا 27 فروری کو لانگ مارچ میں بڑھ چڑھ کر حصہ لیں۔
علاوہ ازیں بلاول بھٹو زرداری کی لاہور میں سیاسی سرگرمیاں جاری ہیں۔ اس حوالے سے بلاول ہاؤس میں چیئرمین پیپلزپارٹی کی زیرصدارت جنوبی پنجاب کے ایگزیکٹوز کا اجلاس ہوا جس میں بلاول بھٹو کو 27 فروری کے لانگ مارچ کی تیاریوں سے متعلق بریفنگ دی گئی۔
اجلاس سے خطاب کرتے ہوئے بلاول بھٹو زرداری کا کہنا تھا کہ 27 فروری کا مارچ پیپلز پارٹی کے احتجاج کا تسلسل ہے۔ اب عوامی احتجاج کا نہ رکنے والا سلسلہ چل پڑا ہے اور حکومت کے خاتمے پر ہی عوام چین سے بیٹھیں گے۔
بلاول بھٹو کا کہنا تھا کہ پیپلزپارٹی نے پارلیمان میں حکومت کے خلاف مؤثر اپوزیشن کی ہے۔
