ڈی جی آئی ایس پی آر نے بھارت کا ایس ایس جی حوالدار کو مارنے کا دعویٰ بے نقاب کردیا

پاک فوج کے شعبہ تعلقات عامہ کے ڈائریکٹر جنرل لیفٹیننٹ جنرل احمد شریف چوہدری نے ایک پاکستانی ایس ایس جی افسر کی آپریشن کے دوران ہلاکت کے بھارتی دعوے کو مسترد کردیا ہے۔

انہوں نے آج راولپنڈی میں ایک نیوز کانفرنس سے خطاب کرتے ہوئے ایس ایس جی کے ریٹائرڈ حوالدار کو میڈیا کے سامنے زندہ پیش کیا۔

ڈائریکٹر جنرل نے گزشتہ ماہ بھارتی سیاسی و عسکری قیادت کی جانب سے کیے گئے نام نہاد دہشت گردی کے واقعے کو فالس فلیگ قرار دیا۔

انہوں نے کہا کہ مقبوضہ جموں و کشمیر میں تعینات بھارتی فوجی کور نے سوشل میڈیا پر لشکر طیبہ کے ایک دہشت گرد کو ہلاک کرنے کا دعویٰ کیا۔

بھارتی فوج نے دعویٰ کیا کہ ہلاک شخص کی شناخت محمد آصف عرف ہاشم موسی کے طور پر ہوئی ہے، جو پاک فوج کے اسپیشل سروسز گروپ میں تھا۔

لیفٹیننٹ جنرل احمد شریف چوہدری کے ہمراہ گفتگو کرتے ہوئے محمد آصف نے کہا کہ وہ زندہ ہیں اور دو ہزار تئیس میں پاک فوج سے ریٹائرمنٹ کے بعد اپنے آبائی ضلع اٹک میں رہائش پذیر ہیں۔

انہوں نے کہا کہ بھارتی فوج کے ہاتھوں اپنی ہلاکت کی جھوٹی خبر سن کر انہیں حیرت ہوئی۔

ڈی جی آئی ایس پی آر نے پاکستان کے خلاف جعلی کارروائیوں کو اجاگر کرتے ہوئے کہا کہ بھارت اپنی دہشت گردی کے شواہد چھپانے کے لیے ایسے واقعات کی خود منصوبہ بندی کرتا ہے۔