صدر، وزیراعظم کا جنوب مشرقی ایشیا میں سیلاب سے جانی نقصان پر اظہارِ افسوس
صدر آصف علی زرداری اور وزیراعظم محمد شہباز شریف نے جنوب مشرقی ایشیا میں شدید سیلاب کے باعث ہونے والے بھاری جانی نقصان اور بڑی تعداد میں لوگوں کی نقل مکانی پر گہرے رنج و غم کا اظہار کیا ہے۔
صدر مملکت نے کہا کہ اس افسوس ناک سانحے میں سیکڑوں افراد جان کی بازی ہار چکے ہیں جبکہ متعدد لاپتہ ہیں، جس نے پاکستان کے عوام کو بھی شدید رنجیدہ کیا ہے۔ انہوں نے انڈونیشیا، ملائیشیا اور تھائی لینڈ کی حکومتوں اور عوام کے ساتھ تعزیت کرتے ہوئے متاثرہ خاندانوں سے دلی ہمدردی کا اظہار کیا۔
صدر آصف علی زرداری نے کہا کہ پاکستان خطے کے شراکت داروں اور بین الاقوامی اداروں کے ساتھ مل کر اپنی استطاعت کے مطابق تعاون کی عملی صورتیں تلاش کرنے کے لیے رابطے میں رہے گا۔ انہوں نے اس عزم کا اظہار کیا کہ پاکستان مشکل کی اس گھڑی میں متاثرہ ممالک کے ساتھ کھڑا ہے۔ انہوں نے جاں بحق افراد کی بلندیٔ درجات اور لاپتہ افراد کی بحفاظت بازیابی کی دعا کی۔
وزیراعظم شہباز شریف نے اپنے پیغام میں سیلاب سے متاثرہ برادریوں کی جلد بحالی اور لاپتہ افراد کی سلامتی کے ساتھ واپسی کے لیے دعا کی۔ انہوں نے کہا کہ پاکستان انڈونیشیا، ملائیشیا اور تھائی لینڈ کے عوام، قیادت اور حکومتوں کے ساتھ اس دکھ کی گھڑی میں مکمل یکجہتی کا اظہار کرتا ہے۔
