چھوٹے اور درمیانے درجے کے کاروباری اداروں کی ترقی سے معیشت مستحکم ہوگی، وزیراعظم

وزیراعظم شہباز شریف نے ہاؤسنگ، چھوٹے اور درمیانے درجے کے کاروباروں اور زرعی شعبے کے لیے قرضوں کی فراہمی میں سرکردہ کمرشل بینکوں کی کوششوں کو سراہا ہے۔

وہ اسلام آباد میں وزیراعظم کی قرضہ سکیموں، جن میں چھوٹے اور درمیانے درجے کے کاروباری اداروں، اپنا گھر پروگرام اور زرعی شعبے کے لیے قرضوں کی فراہمی شامل ہے، کے حوالے سے اعلیٰ کارکردگی کا مظاہرہ کرنے والے بینکوں کے صدور اور سی ای اوز کے وفد سے گفتگو کر رہے تھے۔

وزیراعظم نے کہا کہ چھوٹے اور درمیانے درجے کے کاروبار پاکستان کی معیشت کی ریڑھ کی ہڈی ہیں اور ان کی ترقی سے روزگار کے نئے مواقع پیدا ہوں گے اور معاشی سرگرمیوں کو فروغ ملے گا۔

انہوں نے کہا کہ حکومت کی جانب سے شروع کیے گئے ان اقدامات کا مقصد عام شہریوں، کاروباری افراد اور کسانوں کو مالی وسائل تک رسائی فراہم کرنا ہے۔