روس نے یوکرین کے دارالحکومت کیف پر میزائل داغ دیا
روس نے تقریباً 2 ماہ کے وقفے کے بعد یوکرین کے دارالحکومت کیف پر میزائل داغ دیا تاہم حملے میں کوئی جانی نقصان نہیں ہوا، فضائی دفاعی نظام کے ذریعے رات گئے ہونے والے ڈرون حملوں کو ناکام بنادیا گیا۔
رپورٹ کے مطابق یوکرین کے صدر ولادیمیر زیلنسکی نے کہا کہ کل شام اور آج صبح کے درمیان روس نے کیف پر تقریباً 40 ڈرون اور بیلسٹک میزائل داغے، خارکیف اور اوڈیسا پر بھی ڈرونز اور راکٹ برسائے۔
کیف شہر کی فوجی انتظامیہ کے سربراہ سرگی پوپکو نے کہا کہ 52 روز کے طویل وقفے کے بعد کیف کو ایک میزائل کے ذریعے نشانہ بنایا گیا۔
وسطی کیف میں ’اے ایف پی‘ کے صحافیوں نے صبح کے وقت 2 زوردار دھماکوں کی آوازیں سنیں اور آسمان پر دھواں اڑتے دیکھا گیا، اس کے فوراً بعد ایئر سائرن بجنے لگے۔
فضائیہ نے کہا کہ اس نے کیف کی طرف آنے والے ایک میزائل کو تباہ کر دیا، وہ اسکندر بیلسٹک میزائل یا ایس-400 طیارہ شکن میزائل تھا، واقعے میں کسی جانی نقصان کی اطلاع نہیں ملی۔
فضائی دفاع نے آخری بار 21 ستمبر کو کیف پر داغے گئے ایک میزائل کو مار گرایا تھا، زمین پر گرنے والے ملبے سے ایک بچے سمیت 7 افراد زخمی ہوئے۔
علاقائی فوجی انتظامیہ کے سربراہ رسلان کراچینکو نے کہا کہ 2 میزائل کیف کے علاقے میں 2 بستیوں کے درمیان آگرے، جس سے 5 گھروں کو نقصان پہنچا۔
فضائیہ نے کہا کہ اس نے جمعہ کی شام اور ہفتہ کی صبح کے درمیان روس کی جانب سے لانچ کیے گئے 31 ڈرونز میں سے 19 کو مار گرایا، روس کی جانب سے زیادہ تر حملے فرنٹ لائن علاقوں میں کیے گئے۔
انہوں نے دعویٰ کیا کہ روس نے راتوں رات کئی میزائل داغے لیکن یہ واضح نہیں کہ ان میں سے کسی کو مار گرایا گیا یا نہیں، 2 میزائل اوڈیسا پر گرے جن میں 3 افراد زخمی ہوئے۔
یوکرینی حکام کا کہنا ہے کہ روس توانائی کے انفرااسٹرکچر پر حملے شروع کر سکتا ہے، جواب میں یوکرین روس کے تیل اور گیس کے انفرااسٹرکچرز پر حملے کرے گا۔
توانائی کے وزیر جرمن گالوشینکو نے ایک انٹرویو میں کہا کہ اگر یوکرین کا پاور گرڈ مسلسل حملوں کی زد میں آتا ہے تو روس کے تیل اور گیس کے انفرااسٹرکچرز کو نشانہ بنانا منصفانہ عمل ہوگا۔
