طیب اردوان نے مسلسل تیسری مدت کے لیے ترکیہ کے صدر کا حلف اٹھا لیا

رجب طیب اردوان نے مسلسل تیسری مدت کے لیے ترکیہ کے صدر کا حلف اٹھا لیا۔ترک میڈیا کے مطابق گرینڈ نیشنل اسمبلی کے اسپیکر نے طیب اردوان سے ترکیہ کے صدر کا حلف لیا، حلف برداری کی تقریب میں 21 سربراہان مملکت اور  وزیراعظم پاکستان شہباز شریف سمیت 13 وزرائے اعظم شریک ہوئے۔

اس موقع پر ترک صدر طیب اردوان کا کہنا تھا آئین، قانون اور جمہوری اقدار کی پاسداری کروں گا، اپنے فرائض اور ذمہ داری بہترین انداز میں انجام دوں گا۔ترک میڈیا کے مطابق صدر اردوان آج رات اپنی کابینہ کا اعلان کریں گے اور حلف برداری تقریب میں شریک مہمانوں کو عشائیہ بھی دیں گے۔

یاد رہے کہ ترکیہ میں 14 مئی کو ہونے والے صدارتی انتخابات میں کوئی بھی امیدوار 50 فیصد ووٹ نہیں لے سکا تھا اور پھر دوبارہ 28 مئی کو ملک میں انتخات ہوئے تھے جس میں طیب اردوان نے 52 فیصد سے زائد ووٹ لیکر کامیابی حاصل کی تھی۔