بسم اللہ الرحمن الرحیم

کھیل

شان مسعود پروفیشنل کرکٹ ایسوسی ایشن کےپلیئر آف دی منتھ قرار

پاکستان کرکٹ ٹیم کے بائیں ہاتھ کے اوپنر شان مسعود نے انگلش کاؤنٹی چیمپئن شپ میں پروفیشنل کرکٹرز  ایسوسی ایشن کا پلیئر آف دی منتھ ایوارڈ جیت لیا۔

 شان مسعود نے کاؤنٹی چیمپئن شپ میں بہترین کارکردگی کی بنیاد پر اپریل کے مہینے کا پلیئر آف دی منتھ ایوارڈ اپنے نام کیا۔

شان مسعود نے انگلش کاؤنٹی چیمپئن شپ میں ڈربی شائر کی نمائندگی کرتے ہوئے اپریل میں دو ڈبل سنچریاں اسکور کیں۔

شان مسعود کا مقابلہ تین کاؤنٹی کے کھلاڑیوں کے ساتھ تھا، انہوں نے بین کانمٹن، کیتھ بارکر اور ہیری بروکس کے مقابلے میں 46 فیصد ووٹ حاصل کر کے یہ ایوارڈ اپنے نام کیا۔

اعزاز حاصل کرنے کے بعد شان مسعود کا کہنا تھا کہ مارنس لبوشین کی کاؤنٹی چیمپئن شپ میں بہترین پرفارمنس ایک مثال ہے،بیٹنگ کے حوالے سے ان  سے بات چیت کرتا رہتا ہوں۔

انہوں نے کہا کہ کاؤنٹی چیمپئن شپ کھلاڑی کو بہترین ماحول مہیہ کرتی ہے ، یہ کھلاڑی پر ہوتا ہے کہ وہ کاؤنٹی کرکٹ کا اپنے کیریئر میں کتنا فائدہ اٹھاتا ہے۔

شان مسعود نے کہا کہ گزشتہ دو سال میں کئی مشکلات کا سامنا کرنا پڑا، چھوٹی بہن کے بچھڑ جانے نے زندگی میں بہت کچھ سکھایا، میں نے خود پر پریشر کو ہاوی کرنا چھوڑ دیا ہے اور کرکٹ انجوائے کرتاہوں۔

ان کا کہنا تھا کہ میں 14 کاؤنٹی چیمپئن شپ کے میچ کھیلوں گا جن میں نامور سابق کھلاڑیوں سے ملنے کا موقع ملے گا۔

اس کے علاوہ  شان نے کہا کہ ڈربی شائر میں ہیڈکوچ مکی آرتھر کے ساتھ کام کرنے سے بہت فائدہ ہور ہاہے۔

واضح رہے کہ شان مسعود اپنے کیریئر میں پہلی بار کاؤنٹی چیمپئن شپ میں ڈربی شائر کی نمائندگی کررہے ہیں۔

Back to top button