بسم اللہ الرحمن الرحیم

کھیل

پاکستان نے کمزور زمبابوے کو پہلے ٹی ٹوئنٹی میچ میں قابو کرلیا

پاکستان محمد رضوان کی شاندار اننگز کی بدولت مقررہ 20 اوورز میں 149 رنز بنانے میں کامیاب

تین ٹی ٹونٹی میچز کی سیریز کے پہلے مقابلے میں پاکستان نے زمبابوے کو 11 رنز سے شکست دیکر سیریز میں 0-1 کی برتری حاصل کرلی ۔ ہرارے سپورٹس کلب میں کھیلے جارہے سیریز کے پہلے میچ میں پاکستانی بیٹنگ لائن مکمل ناکام ثابت ہوئی تاہم محمد رضوان کی شاندار اننگز کی بدولت مقررہ 20 اوورز میں 149 رنز بنانے میں کامیاب رہی۔

زمبابوے کی جانب سے تناشے کمن ہکاموے اور ویزلے میڈھویرے نے اننگز کا آغاز کیا، میڈھویرے نے جارحانہ آغاز کیا تاہم وہ 14 رنز پر اپنی وکٹ گنوا بیٹھے جس کے بعد اپنا پہلا میچ کھیلنے والے تدی وانشے مرومانی کریز پر آئے اور پہلی ہی گیند پر اپنی وکٹ گنوا دی۔ تناشے کمن ہکاموے اور کریگ ارون کے درمیان تیسری وکٹ کے لیے 56 رنز کی اہم شراکت قائم کی تاہم محمد حفیظ نے اس شراکت کا خاتمہ کیا، کمن ہکاموے29 رنز بنانے کے بعد آؤٹ ہوئے، اگلے ہی اوور میں ایرون کی ہمت بھی 34 رنز پر جواب دے گئی۔

کپتان سین ولیمز صرف 9 رنزبناسکے۔ وکٹ کیپر بیٹسمین ریگس چکابوا 3 رنز کے مہمان ثابت ہوئے۔ قومی ٹیم کی جانب سے عثمان قادر نے 3، محمد حسنین نے 2 جب کہ محمد حفیظ نے ایک وکٹ حاصل کی۔اس سے قبل زمبابوے نے ٹاس جیت کر پاکستان کو بیٹنگ کی دعوت دی۔ پاکستان کی جانب سے محمد رضوان اور بابراعظم نے اننگز کا آغاز کیا۔ 8 کے مجموعی سکور پر مزاربانی نے بابراعظم کو آؤٹ کردیا، انہوں نے صرف 2 رنز بنائے۔

بابر کے بعد رضوان کا ساتھ نبھانے فخر زمان میدان میں اترے اور دونوں نے 34 رنز کی شراکت داری قائم کی، اس موقع پر فخر زمان کو مدھیویرے نے 13 رنز پر آؤٹ کردیا۔ تیسرے آؤٹ ہونیوالے کھلاڑی محمد حفیظ تھے جو صرف 5 رنز بناسکے۔ اپنا پہلا ٹی ٹونٹی کھیلنے والے دانش عزیز 15 رنز کے مہمان ثابت ہوئے،حیدر علی ایک بار پھر ناکام ثابت ہوئے، وہ صرف 5 رنز بناسکے۔
فہیم اشرف صرف ایک رن بناسکے۔ محمد رضوان نے ایک اینڈ سنبھالے رکھا اور اپنی نصف سنچری مکمل کی، وہ 82 رنز پر ناٹ آؤٹ واپس آئے، ان کی اننگز میں 10 چوکے اور ایک چھکا شامل تھا۔ تین میچوں کی سیریز کے پہلے میچ میں پاکستان کی جانب سے دانش عزیز آج اپنا ڈیبیو کر رہے ہیں۔ پاکستان اور زمبابوے کے درمیان ٹی20 سیریز کے اگلے دو میچز بھی ہرارے میں 23 اور 25 اپریل کو کھیلے جائیں گے اور سٹیڈیم میں شائقین کو داخلے کی اجازت نہیں ہو گی۔

ٹی20 سیریز کے بعد دونوں ٹیموں کے درمیان دو ٹیسٹ میچوں کی سیریز بھی کھیلی جائے گی۔ میچ کے لیے پاکستانی ٹیم میں بابراعظم (کپتان)، محمد رضوان، فخر زمان، محمد حفیظ، حیدر علی، دانش عزیز، محمد نواز، فہیم اشرف، عثمان قادر، محمد حسنین اور حارث رؤف شامل ہیں جب کہ زمبابوے کی ٹیم سین ولیمز (کپتان)، تِناشے کموہکاموے، ویزلے مدہیورے، تدیوَناشے مرومانی، کریگ اروائن، رائن بَرل، ریجِس چاکبوا، لیوک جونگوے، ویلنگٹن مساکڈزا، بلیسنگ موزاربانی اور رِچرڈ نراوا پر مشتمل ہے ۔

یہ بھی پڑھیے

Back to top button