یوم عاشور ظلم و جبر کیخلاف ڈٹ جانے کا درس دیتا ہے، وزیراعظم، امام حسینؓ کا پیغام پوری دنیا میں گونج رہا ہے، صدر
ملک بھر میں یوم عاشور آج عقیدت و احترام سے منایا جائے گا، وزیراعظم شہباز شریف اور صدر مملکت ڈاکٹر عارف علوی نے اس موقع پر قوم کے نام خصوصی پیغام جاری کیا ہے۔
وزیر اعظم شہباز شریف نے اپنے پیغام میں کہا ہے کہ یوم عاشور ،دنیا بھر کے مسلمانوں کیلئے گہری تاریخی اور روحانی اہمیت رکھتا ہے، حضرت امام حسین نے اصحاب اور اہل بیت کے ساتھ کربلا کی جنگ میں ظلم،جبر اور نا انصافی کے خلاف ڈٹ کر مقابلہ کیا۔
شہباز شریف نے کہا کہ حضرت امام حسین کی قربانی ہمیں غیر متز لزل ایمان،راست بازی اور انصاف کے حصول کا انمول سبق سکھاتی ہے، ان کی قربانی کسی خاص وقت یا مقام تک محدود نہیں تھی۔ یہ دن ہمیں یاد دلاتا ہے کہ ظلم و جبر کے خلاف کھڑا ہونا ایک مسلمان کا اخلاقی فرض ہے۔
وزیراعظم نے مزید کہا کہ ہمیں حضرت امام حسین کی قربانی سے سبق حاصل کرنا چاہیے، مقاصد کے حصول کی راہ میں جو رکاوٹیں حائل ہوتی ہیں انہیں ثابت قدمی سے دور کیا جاسکتا ہے،اللہ تعالی ہماری قوم اور امت مسلمہ پر رحم فرمائے اور اللہ تعالی ہمیں اسلام کی تعلیمات اور حضرت امام حسین کی عظیم میراث پر ثابت قدم رہنے کی توفیق عطا فرمائے۔
دوسری جانب صدر مملکت عارف علوی نے یوم عاشور کے موقع پر اپنے پیغام میں کہا کہ عاشورہ محرم اسلامی تاریخ میں بہت اہمیت رکھتا ہے، یوم عاشور عظیم تر مقصد کیلئے کسی بھی قربانی سے دریغ نہ کرنے کا درس دیتا ہے۔ شہادت امام حسین کا فلسفہ ظلم و جبر کے خلاف ہر قیمت پر ڈٹ جاناہے۔
صدر مملکت نے کہا کہ حضرت امام حسین کے ساتھی پر آشوب وقت میں ان کے شانہ بشانہ کھڑے تھے، یہ دن ہمیں وفاداری،راستبازی اور حق وانصاف کیلئے جدوجہد کرنے والوں کا ساتھ دینے کی اہمیت سکھاتا ہے۔
انہوں نے اپنے پیغام میں مزید کہا کہ حضرت امام حسین نے طاقت،تعداد کم ہونے کے باوجود اسلام کے اصولوں،اقدار سے دستبردار ہونے سے انکار کیا،حضرت امام حسین نے اسلام کی حقیقی تعلیمات کے تحفظ کیلئے اپنے خاندان اور ساتھیوں سمیت اپنی جان قربان کردی، یہ ایک یاد دہانی ہے کہ ہمیں معاشرے کی عظیم تربھلائی اور انسانیت کی بہتری کیلئے ذاتی آسائشوں اور خواہشات کو ترک کردینا چاہیے۔
صدر کا کہنا تھا کہ آج حضرت امام حسین کا پیغام پوری دنیا کے مسلمانوں میں گونج رہا ہے، عاشورہ کے موقع پر ہمیں مختلف مکاتب فکر کے درمیان مکالمے اور افہام و تفہیم کی اہمیت کو بھی یاد رکھنا چاہیے، تمام پاکستانیوں سے اپیل کرتا ہوں کہ متحد ہو کر اور اپنے اختلافات کو بھلا کر پاکستان کی ترقی کیلئے کام کریں۔
صدر عارف علوی نے کہا کہ اللہ تعالی ہمیں حضرت امام حسین کی قربانیوں سے سبق حاصل کرنے ،ہمت ،استقامت اور دلیری کے ساتھ آگے بڑھنے کی توفیق عطا کرے۔
