انقرہ میں تیسرے یوم استحقاق کشمیر کے حوالے سے سیمینار، پاکستانی سفیر کا کشمیر پر ترک عوام، حکومت کے اصولی موقف پر شکریہ
انقرہ میں تیسرے یوم استحقاق کشمیر کے حوالے سے ایک سیمینار بعنوان ’’ماضی سے حال تک قانونی جہت کے ساتھ کشمیر‘‘ منعقد ہوا۔
اس موقع پر خطاب کرتے ہوئے ترکی میں پاکستان کے سفیر سجاد قاضی نے کشمیر پر اصولی موقف پر ترک عوام اور حکومت کا شکریہ ادا کیا۔
انہوں نے کہا کہ ترکی کی حمایت اور یکجہتی ہندوستان کے غیر قانونی طور پر مقبوضہ جموں و کشمیر کے لاکھوں مظلوموں کے لیے زبردست طاقت کا ذریعہ ہے اور ان کے حق خود ارادیت کے حصول کے لیے ایک اہم شراکت ہے۔
سفیر نے کہا کہ نہ تو 75 سالہ غیر قانونی بھارتی قبضے اور نہ ہی بھارتی قابض افواج کی انتہائی بربریت کشمیری عوام کے جذبے کو پست کرنے میں کامیاب ہو سکی ہے جو اپنے حق خودارادیت کے لیے جدوجہد کر رہے ہیں۔
انہوں نے کہا کہ بھارت کو 5 اگست 2019 کے اپنے غیر قانونی اور یکطرفہ اقدامات کو واپس لینا چاہیے، غیر قانونی طور پر مقبوضہ جموں و کشمیر میں اپنا غیر انسانی فوجی محاصرہ ختم کرنا چاہیے اور مقبوضہ علاقے کے آبادیاتی ڈھانچے کو تبدیل کرنے کے لیے اپنے غیر قانونی اقدامات کو روکنا چاہیے۔
