امریکا کی ترکی کو تنبیہ

امریکا نے ترکی کو خبر دار کرتے ہوئے کہا ہے کہ وہ روس سے مزید ہتھیار نہ خریدے۔

فرانسیسی خبر رساں ایجنسی ( اے ایف پی) کےمطابق امریکا نے جمعے کے روز ترکی کو خبردار کیا کہ اگر وہ روس سے مزید ہتھیار خریدتا ہےدونوں ملکوں کے درمیان  دوطرفہ تعلقات کو مزید خطرات لاحق ہوں گے۔

واضح رہے کہ  ترکی نے 2017 میں روس کے ایس -400 ائیر ڈیفنس سسٹم خریدنے کے لیے امریکی وارننگ کی خلاف ورزی کی تھی۔

امریکا کی نائب وزیر خارجہ وینڈی شرمین نے سوئٹزرلینڈ کے دورے کے دوران صحافیوں سے بات کرتے ہوئے کہا کہ ہم نے ہر سطح اور ہر موقع پر ترکی پر زور دیا ہے کہ وہ ایس 400 ائیر ڈیفنس سسٹم کو برقرار نہ رکھے اور کوئی اضافی روسی فوجی ساز و سامان خریدنے سے گریز کرے۔

انہوں نے کہا کہ اگر ترکی روس سےمزید ہتھیار خریدتا ہے تو واضح رہے کہ اس کے نتائج کیا ہوں گے۔

خیال رہے کہ کچھ روز قبل  ترک صدر رجب طیب اردگان نےاپنے روسی ہم منصب ولادی میر پیوٹن سے ملاقات میں جنگی طیاروں اور ممکنہ آبدوزوں سمیت  وسیع تر فوجی تعاون پر تبادلہ خیال کیا تھا۔

ترک صدر کا کہنا تھا کہ ان کے امریکی صدر جو بائیڈن کے ساتھ تعلقات کی شروعات اچھی نہیں ہوسکی۔