بسم اللہ الرحمن الرحیم

بین الاقوامی

پاکستان کی امداد پر شکرگزار، دنیا سے اپیل ہے ہمیں تسلیم کریں، ذبیح اللہ مجاہد

امریکا سمیت دیگر ممالک ہمیں تسلیم کریں اس پرکام کررہے ہیں، اگر کسی ملک کو ہم سے تشویش ہے تو اسے سیاسی طور پر حل کریں گے۔

افغانستان میں طالبان کی عبوری حکومت کے نامزد نائب وزیر اطلاعات ذبیح اللہ مجاہد نے عالمی برادری سے طالبان کی حکومت تسلیم کرنے کی اپیل کردی۔

نجی ٹی وی چینل سے گفتگو کرتے ہوئے ذبیح اللہ مجاہد نے کہا کہ کابینہ اراکین دفاتر میں بیٹھ رہے ہیں اور لوگوں کےکام ہورہے ہیں جب کہ  گزشتہ حکومت کےساتھ کام کرنے والے اہلکار ہمارے ساتھ کام کررہے ہیں۔

انہوں نے کہا کہ وزرات خارجہ فعال ہوگئی ہے، ہم دنیا سے تعلقات رکھیں گے، امریکا سمیت دیگر ممالک ہمیں تسلیم کریں اس پرکام کررہے ہیں، اگر کسی ملک کو ہم سے تشویش ہے تو اسے سیاسی طور پر حل کریں گے۔

ذبیح اللہ مجاہد کا کہنا تھا کہ عالمی برادری سے اپیل کرتے ہیں کہ ہماری مدد کرے، افغانستان مشکل صورتحال سے دوچار ہے لہٰذا دنیا ہماری حکومت تسلیم کرے۔

انہوں نے مزید کہا کہ پاکستان حکومت کے ہمارے ساتھ اچھے تعلقات ہیں، پاکستان نے ہمارے لیے امداد بھیجی اس پر پاکستان کے شکرگزار ہیں۔

نامزد نائب وزیر اطلاعات کا کہنا تھا کہ پنجشیر پر ہم نے کنٹرول کرلیا ہے  اور  لڑائی ختم ہوگئی ہے۔

Back to top button