پاکستان اپنے سائبر دفاع کو دنیا میں بہترین بنانے کے لیے مؤثر اقدامات کر رہا ہے: شزہ فاطمہ
وزیر مملکت برائے انفارمیشن ٹیکنالوجی شزہ فاطمہ نے کہا ہے کہ پاکستان اپنی خودمختار تکنیکی صلاحیتوں اور سائبر دفاع کو بے مثال بنانے کے لیے مؤثر اقدامات کر رہا ہے۔
آج اسلام آباد میں مارگلہ ڈائیلاگ سے خطاب کرتے ہوئے انہوں نے کہا کہ پاکستان نے گزشتہ سال بھارت کے خلاف روایتی جنگ میں کامیابی حاصل کرنے کے ساتھ معرکۂ حق کے دوران اپنی سائبر صلاحیتوں کا بھی مظاہرہ کیا۔
شزہ فاطمہ نے کہا کہ حکومت ملک کی ڈیجیٹل تبدیلی پر توجہ دے رہی ہے اور اس مقصد کے لیے جامع ڈیٹا گورننس پالیسی تیار کر لی گئی ہے، جس کا اعلان آئندہ چند ہفتوں میں کیا جائے گا۔
ان کے مطابق اس پالیسی کا مقصد سخت حکومتی اصولوں کے تحت اداروں کے درمیان محفوظ اور ذمہ دارانہ ڈیٹا شیئرنگ اور باہمی رابطے کو یقینی بنانا ہے۔ اس کے علاوہ عوام اور نوجوانوں کو جدت کے فروغ کے لیے مناسب طریقے سے صاف کیے گئے ڈیٹا تک رسائی بھی فراہم کی جائے گی۔
وزیر نے کہا کہ حکومت پاکستان کو ڈیجیٹل ملک میں تبدیل کرنے کے لیے تمام ضروری بنیادی ڈھانچے اور سہولیات کی تیاری پر کام کر رہی ہے۔
انہوں نے مزید بتایا کہ حکومت نے مصنوعی ذہانت کے شعبے میں ایک ارب ڈالر کی سرمایہ کاری کا اعلان کیا ہے، جس کی توجہ انفراسٹرکچر کی ترقی، مہارتوں میں اضافے، جدت اور رابطوں کے فروغ پر مرکوز ہوگی۔
