وزیراعظم شہباز شریف آج سے ایران اور ترکی کے سرکاری دورے پر روانہ ہوں گے
وزیراعظم شہباز شریف آج جمعہ سے اسلامی جمہوریہ ایران اور جمہوریہ ترکی کے سرکاری دورے پر روانہ ہوں گے۔ اس اہم دورے میں ان کے ہمراہ نائب وزیراعظم و وزیر خارجہ اسحاق ڈار، وفاقی کابینہ کے دیگر وزراء اور اعلیٰ حکام بھی موجود ہوں گے۔
وزیراعظم اپنے دورے کا آغاز ایران سے کریں گے، جہاں وہ ایران کے مرحوم سپریم لیڈر آیت اللہ علی خامنہ ای کی نمازِ جنازہ اور تدفین کی تقریبات میں شرکت کریں گے۔ اس موقع پر وہ پاکستانی عوام اور حکومت کی جانب سے ایرانی قیادت اور سوگوار خاندانوں سے دلی تعزیت کا اظہار کریں گے اور غم کی اس گھڑی میں برادر ایرانی قوم کے ساتھ پاکستان کی مکمل یکجہتی کا اعادہ کریں گے۔
ایران کے بعد وزیراعظم شہباز شریف ترک صدر رجب طیب اردوان کی دعوت پر استنبول پہنچیں گے، جہاں دونوں رہنماؤں کے درمیان دوطرفہ تعلقات کے مختلف پہلوؤں پر تفصیلی بات چیت ہوگی۔ ملاقات میں خاص طور پر تجارت، سرمایہ کاری، علاقائی امن اور سیکیورٹی کے امور پر توجہ دی جائے گی۔
دورۂ ترکی کے دوران وزیراعظم ایک کاروباری کانفرنس سے بھی خطاب کریں گے، جس کا مقصد پاکستان میں سرمایہ کاری اور تجارتی مواقع کو اجاگر کرنا ہے۔ کانفرنس میں خصوصی اقتصادی زونز (SEZs)، توانائی، تجارت، آئی ٹی اور نجکاری سمیت مختلف شعبوں میں سرمایہ کاری کے امکانات پیش کیے جائیں گے۔
اس کانفرنس میں ترکی کے ممتاز سرمایہ کار، کاروباری شخصیات، اعلیٰ حکام اور دونوں ممالک کی کاروباری برادری کے نمائندے شرکت کریں گے۔
حکومتی اعلامیے کے مطابق وزیراعظم کا ایران اور ترکی کا یہ دورہ دونوں برادر ممالک کے ساتھ پاکستان کے تاریخی، ثقافتی اور برادرانہ تعلقات کو مزید مضبوط بنانے کی عکاسی کرتا ہے۔
