پاکستان معاشی استحکام برقرار رکھنے کے لیے پُرعزم: محمد اورنگزیب
وفاقی وزیر خزانہ محمد اورنگزیب نے کہا ہے کہ پاکستان میکرو اکنامک استحکام برقرار رکھنے اور پائیدار معاشی ترقی کے لیے ساختی اصلاحات کو آگے بڑھانے کے لیے پُرعزم ہے۔
وہ آج اسلام آباد میں فرانس کے سفیر نکولس گیلی سے ملاقات کے دوران گفتگو کر رہے تھے، جنہوں نے ان سے ملاقات کی۔
وزیر خزانہ نے سفیر کا خیرمقدم کرتے ہوئے کہا کہ پاکستان فرانس کے ساتھ اپنے دیرینہ اور کثیرالجہتی تعلقات کو بہت اہمیت دیتا ہے، خصوصاً اقتصادی تعاون، سرمایہ کاری اور ترقیاتی شراکت داری کے شعبوں میں۔
محمد اورنگزیب نے کہا کہ حکومت معاشی صورتحال پر گہری نظر رکھے ہوئے ہے اور پالیسی اقدامات تیار کر رہی ہے تاکہ معاشی کامیابیوں کا تحفظ کیا جا سکے، اہم سپلائی چینز کا تسلسل برقرار رہے اور سرمایہ کاروں کا اعتماد قائم رکھا جا سکے۔
ملاقات میں پاکستان کے بین الاقوامی مالیاتی اداروں کے ساتھ تعلقات پر بھی تبادلہ خیال کیا گیا۔ وزیر خزانہ نے بتایا کہ پاکستان آئی ایم ایف پروگرام کے تحت اصلاحاتی ایجنڈے پر عملدرآمد کے لیے پُرعزم ہے اور اس حوالے سے جاری مذاکرات مثبت انداز میں آگے بڑھ رہے ہیں۔
فرانسیسی سفیر نے حکومت کی معاشی استحکام اور اصلاحات کے لیے کوششوں کو سراہا اور بیرونی چیلنجز سے نمٹنے میں پاکستان کی صلاحیت کا اعتراف کیا۔ انہوں نے پاکستان کی اقتصادی ترقی کے لیے فرانس کی مسلسل حمایت کا اعادہ کیا اور مختلف شعبوں میں دوطرفہ تعاون کو مزید مضبوط بنانے میں دلچسپی ظاہر کی۔
ملاقات میں بدلتی ہوئی عالمی صورتحال اور اس کے عالمی توانائی منڈیوں اور معاشی حالات پر ممکنہ اثرات پر بھی تبادلہ خیال کیا گیا۔
وزیر خزانہ نے کہا کہ حکومت توانائی کی فراہمی اور قیمتوں سے متعلق ممکنہ خطرات پر کڑی نظر رکھے ہوئے ہے اور متعلقہ فریقین کے ساتھ رابطے میں ہے تاکہ ابھرتے ہوئے چیلنجز سے نمٹنے کے لیے مؤثر پالیسی اقدامات کیے جا سکیں۔
