بسم اللہ الرحمن الرحیم

قومی

 یو  اے ای کے صدر کی وزیراعظم شہباز شریف کو 10 ارب ڈالر سرمایہ کاری کی یقین دہانی

متحدہ عرب امارات (یو اے ای) نے پاکستان میں سرمایہ کاری کے لیے 10 ارب ڈالر مختص کردیے۔اماراتی سرکاری خبر ایجنسی وام کی رپورٹ کے مطابق  متحدہ عرب امارات کی حکومت نے پاکستان میں اقتصادی شعبوں میں سرمایہ کاری کے لیے 10 ارب ڈالر مختص کرنےکا اعلان کیا ہے۔ وام کی رپورٹ کے مطابق  یہ اعلان آج  اماراتی صدر شیخ محمد بن زاید النہیان اور پاکستانی وزیراعظم شہباز شریف کی ملاقات کے بعد کیا گیا۔

خیال رہے کہ وزیراعظم شہباز شریف نے ابوظبی میں متحدہ عرب امارات (یو اے ای) کے صدر شیخ محمدبن زاید النہیان سے ملاقات کی ہے۔حکومتی اعلامیے کے مطابق ملاقات میں نائب وزیر اعظم و وزیر خارجہ  اسحاق ڈار، وزیر تجارت جام کمال خان، وزیر دفاع خواجہ آصف اور معاون خصوصی طارق فاطمی بھی وزیر اعظم کے ہمراہ  شریک تھے۔وزیر اعظم نے متحدہ عرب امارات کے صدر کے ساتھ شیخ طحنون بن محمد النہیان اور شیخ حزہ بن سلطان النہیان کی وفات پر تعزیت بھی کی۔

ملاقات میں دونوں ممالک کے مابین دو طرفہ تعلقات بشمول سیاسی، اقتصادی اور دفاعی شعبوں میں تعاون پر گفتگو ہوئی۔ وزیر اعظم نے پاکستان کی متحدہ عرب امارات کے ساتھ شراکت داری بالخصوص انفارمیشن  ٹیکنالوجی، قابل تجدید توانائی اور  سیاحت کے شعبوں میں تعاون کے فروغ کے عزم کا اعادہ کیا۔

وزیر اعظم نے متحدہ عرب امارات کی پاکستان میں توانائی، پورٹ آپریشنز منصوبوں، غذائی تحفظ، مواصلات، معدنیات، بینکنگ اور مالیاتی سروسز کے شعبے میں سرمایہ کاری پر عملدرآمد کو یقینی بنانے کے عزم کا اظہار کیا۔ملاقات میں اماراتی صدر شیخ محمد بن زاید نے وزیراعظم شہباز شریف سے   پاکستان میں 10 ارب ڈالر کی سرمایہ کاری کی یقین دہانی کرائی۔

مزید پڑھیے  ازخود نوٹس پر فیصلوں کیخلاف اپیل کا حق نوازشریف،یوسف رضا گیلانی اور جہانگیر ترین کو مل گیا

اس سے قبل ابوظبی میں آئی ٹی کمپنیوں کے درمیان شراکت داری پر راؤنڈ ٹیبل سیشن سے خطاب کرتے ہوئے وزیراعظم کا کہنا تھا کہ متحدہ عرب امارات سے قرض نہیں مشترکہ سرمایہ کاری چاہتے ہیں،کشکول توڑ دیا ہے، اس کشکول سے ہم کہیں کے نہیں رہیں گے۔

Back to top button