عسکری و سول تنصیبات میں توڑ پھوڑ، تحقیقات کیلئے جے آئی ٹی بنانے کا فیصلہ
نگران وزیر اعلیٰ پنجاب محسن نقوی نے جناح ہائوس، عسکری و سول تنصیبات میں توڑ پھوڑ اور جلا ئوگھیرائو کی تحقیقات کے لئے جے آئی ٹی بنانے کا فیصلہ کیا ہے۔محسن نقوی کی زیر صدارت امن و امان کی صورتحال پر اجلاس ہوا۔اجلاس میں فیصلہ کیا گیا کہ جے آئی ٹی واقعات کی تحقیقات کر کے جامع رپورٹ حکومت کو پیش کرے گی۔نگرا ن وزیر اعلیٰ پنجاب نے تمام شرپسندوں کو قانون کی گرفت میں لانے کے لئے کارروائیاں مزید تیز کرنے کا حکم دیا ہے۔اجلاس کے دوران گفتگو کرتے ہوئے محسن نقوی نے کہا ہے کہ توڑ پھوڑ والے تمام مقامات کی جیو فینسنگ کرائی جائے گی۔
انہوں نے کہا کہ شرپسندوں کے خلاف تمام کیس انسداد دہشت گردی کی عدالت میں چلائے جائیں گے، کسی گناہ گار کو چھوڑیں گے نہیں اور بے گناہ کو پکڑیں گے نہیں۔محسن نقوی نے کہا کہ شواہد اور ثبوتوں کے ساتھ ہر شرپسند کو قانون کے کٹہرے میں لایا جائے گا، عسکری و سول املاک پر حملہ کرنے والے عناصر عبرتناک سزا سے نہیں بچ پائیں گے۔نگران وزیر اعلیٰ پنجاب نے کہا کہ شرپسندوں کے خلاف زیرو ٹالرنس پالیسی اپنائی ہے، صورتحال میں بہتری آ رہی ہے، عوام کے جان و مال کے تحفظ کو یقینی بنائیں گے۔انہوںنے کہا کہ شرپسند عناصر کے مذموم عزائم کو ناکام بنانے کے لیے پوری فورس الرٹ ہے۔
