موٹر سائیکلوں کی قیمت میں اضافہ
بائیک اسمبلر نے 70 سے 125 سی سی موٹر سائیکلوں کی قیمت میں 3 ہزار روپے تک کے اضافے کا اعلان کیا ہے جس کا اطلاق آئندہ ہفتے 8 نومبر سے ہوگا۔
رپورٹ کے مطابق سپر اسٹار نامی برانڈ کی موٹر سائیکلوں اور رکشوں کے اسمبلر میمن موٹر پرائیویٹ لمیٹڈ (ایم ایم پی ایل) نے گاڑیوں کی قیمت میں اضافے کی وجہ ایلومینیم شیٹ میٹل، پلاسٹک اور دیگر پارٹس کی قیمتیں بڑھنے کو قرار دیا۔
اس سے قبل اٹلس ہونڈا نے یکم نومبر سے موٹر سائیکل کی قیمت میں 4 ہزار سے 6 ہزار روپے تک کا اضافہ کردیا تھا۔
ملک بھر میں پیٹرول کی قیمت میں اضافے اور ٹرانسپورٹ کے غیر مؤثر نظام کے باعث موٹر سائیکل کی طلب میں اضافہ ہورہا ہے۔
حکومت کی جانب سے چیک اینڈ بیلنس نہ ہونے کے باعث موٹرسائیکل اسمبلرز 94 فیصد پارٹس مقامی سطح پر تیار کیے جانے کے باوجود شرح تبادلہ کی بنیاد پر قیمتیں بڑھائے جارہے ہیں۔
پاکستان ادارہ شماریات ( پی بی ایس) کے اعداد و شمار کے مطابق رواں مالی سال کی پہلی سہ ماہی میں ٹو وہیلر گاڑیوں کی مکمل اور نیم تیار شدہ کٹس کی برآمدات میں 69 فیصد اضافہ ہوا اور یہ گزشتہ برس کے اسی عرصے کے ایک کروڑ 10 لاکھ ڈالر سے بڑھ کر ایک کروڑ 80 لاکھ ڈالر ہوگئی
