پاکستان کا افریقہ کے امن و سلامتی کے ایجنڈے کی حمایت جاری رکھنے کا اعادہ
پاکستان نے افریقہ میں امن، سلامتی اور ترقی سے متعلق ترجیحات کی بھرپور حمایت جاری رکھنے کے عزم کو دہرایا ہے اور کہا ہے کہ وہ علاقائی شراکت داروں اور عالمی برادری کے ساتھ مل کر اس حوالے سے اپنا کردار ادا کرتا رہے گا۔
اقوامِ متحدہ کی سلامتی کونسل کے اجلاس سے خطاب کرتے ہوئے، جو کہ اقوامِ متحدہ کے وسطی افریقہ کے علاقائی دفتر (UNOCA) کے حوالے سے منعقد ہوا، پاکستان کے مشن برائے اقوامِ متحدہ کے کونسلر اور پولیٹیکل کوآرڈینیٹر گل قیصر سرواں نے یہ مؤقف پیش کیا۔
انہوں نے وسطی افریقہ میں بڑھتے ہوئے سیکیورٹی اور انسانی بحرانوں سے نمٹنے کے لیے قابلِ بھروسہ وسائل اور مضبوط بین الاقوامی شراکت داری کی ضرورت پر زور دیتے ہوئے کہا کہ عالمی برادری کو خطے کے چیلنجز کے حل کے لیے متحد ہو کر کام کرنا ہوگا۔
پاکستان نے انسانی ہمدردی کے بحرانوں کو بڑھانے والے تنازعات کے حل کا مطالبہ کر دیا
12 دسمبر 2025 — پاکستان کے مستقل نمائندے برائے اقوامِ متحدہ، عاصم افتخار احمد نے بڑھتے ہوئے انسانی ہمدردی کے بحرانوں سے نمٹنے کے لیے عالمی برادری سے فوری اور مؤثر اقدامات کرنے کا مطالبہ کیا ہے۔
انہوں نے اقوامِ متحدہ کی جنرل اسمبلی میں انسانی امداد کے موضوع پر بحث کے دوران کہا کہ حل طلب تنازعات انسانی ہمدردی کی ضروریات کی بنیادی وجہ ہیں اور انسانی امداد صرف عارضی حل فراہم کر سکتی ہے، سیاسی حل کا نعم البدل نہیں بن سکتی۔
عاصم افتخار نے زور دیا کہ تنازعات کے پُرامن حل کے لیے موجودہ میکانزمز، بشمول روک تھام کی سفارت کاری، ثالثی، اور سیکرٹری جنرل کے اچھے دفاتر کو مضبوط بنایا جائے تاکہ طویل المدتی تنازعات اور اختلافات کو حل کیا جا سکے۔
انہوں نے بین الاقوامی انسانی اور انسانی حقوق کے قوانین کے مکمل احترام، شہریوں اور بنیادی ڈھانچے کے تحفظ، اور انسانی امداد تک بغیر رکاوٹ رسائی کی فوری ضرورت پر بھی زور دیا۔
