جدید ٹیکنالوجی نے امیگریشن کا عمل آسان بنا دیا ہے: محسن نقوی
لاہور، 9 اگست 2026: وفاقی وزیر داخلہ محسن نقوی نے کہا ہے کہ جدید ٹیکنالوجی نے امیگریشن کے عمل کو آسان بنا دیا ہے، جبکہ جعلی سفری دستاویزات استعمال کرنے والوں کے خلاف سخت کارروائی کی جا رہی ہے۔
انہوں نے ان خیالات کا اظہار آج لاہور کے علامہ اقبال انٹرنیشنل ایئرپورٹ کے اچانک دورے کے دوران کیا، جہاں انہوں نے امیگریشن کے عمل کا جائزہ لیا اور مختلف کاؤنٹرز کا معائنہ کیا۔
وزیر داخلہ نے مسافروں کو سہولت فراہم کرنے اور امیگریشن کا عمل تیز کرنے کے لیے حکام کو تمام امیگریشن کاؤنٹرز کھلے رکھنے کی ہدایت کی۔
محسن نقوی نے متعلقہ حکام کو ہدایت کی کہ مسافروں کو امیگریشن کے دوران ہر ممکن سہولت فراہم کی جائے اور جدید ٹیکنالوجی سے استفادہ کرتے ہوئے عمل کو مزید مؤثر بنایا جائے۔
وزیر داخلہ نے واضح کیا کہ جعلی سفری دستاویزات استعمال کرنے والے افراد کے خلاف سخت کارروائی کا سلسلہ جاری رہے گا۔
