مری جانے والے تمام راستے بند، ایبٹ آباد سے نتھیاگلی جانے والوں کے لیے ہرنوئی کا راستہ بند

ترجمان اسلام آباد پولیس کے مطابق مری جانے والے تمام داخلی راستے تاحال بند ہیں جبکہ دونوں مرکزی راستوں پر ڈائیورشنز لگا کر ٹریفک کو واپس موڑا جا رہا ہے۔ موجودہ صورتحال کے پیش نظر راستے کھلنے کا فی الحال کوئی امکان نہیں۔

ترجمان کا کہنا ہے کہ جیسے ہی راستوں کی بحالی ممکن ہوئی، شہریوں کو بروقت آگاہ کر دیا جائے گا۔ اسلام آباد ٹریفک پولیس کے افسران ٹریفک کے دبائو کو کم کرنے اور سڑکوں پر روانی برقرار رکھنے کے لیے مصروف عمل ہیں۔اسلام آباد پولیس نے مری جانے والے سیاحوں سے اپیل کی ہے کہ وہ اس جانب سفر سے گریز کریں اور ٹریفک پولیس کے ساتھ مکمل تعاون کریں تاکہ کسی بھی ہنگامی صورتحال سے بچا جا سکے۔

گلیات میں کسی سیاح کے پھنسنے یا نقصان کی کوئی اطلاع نہیں، ترجمان جی ڈی اے

 ایبٹ آباد سے نتھیا گلی جانے والے سیاحوں کے لیے ہرنوئی کا راستہ بند ہے، سیف الرحمان

ترجمان گلیات ڈیولپمنٹ اتھارٹی سیف الرحمان نے کہا ہے کہ گلیات میں کسی سیاح کے پھنسنے یا نقصان کی کوئی اطلاع نہیں۔ ترجمان جی ڈی اے کے مطابق سیاحوں کو مکمل اور ہر طرح کی سہولیات فراہم کر رہے ہیں، عملہ 24 گھنٹے فیلڈ میں موجود ہے صورتحال پر نظر رکھے ہوئے ہیں۔ 

ترجمان کے مطابق گلیات کے مختلف علاقوں میں شدید برفباری ہو رہی ہے، جی ڈی اے اور پختونخوا ہائی وے اتھارٹی باہمی تعاون سے روڈ کلیئرنس کے کام میں مصروف ہیں۔  انہوں نے کہا کہ مسلسل برفباری کے باوجود سڑکوں کو بحال کرنے کی کوششیں جاری ہیں۔ مری سے نتھیا گلی آنے والا راستہ عارضی طور پر بند کر دیا گیا ہے۔

ترجمان جی ڈی اے کے مطابق مری سے نتھیا گلی کا راستہ سیاحوں کے تحفظ کی خاطر بند کیا گیا ہے، ایبٹ آباد سے نتھیا گلی جانے والے سیاحوں کے لیے ہرنوئی کا راستہ بند ہے۔ سیاحوں سے اپیل ہے غیر ضروری سفر سے گریز کریں۔

اشتہار