مراکش میں تباہ کن زلزلہ، ہلاکتیں 2862تک پہنچ گئیں
2500 سے زائد افراد زخمی ہیں،کئی علاقوں کی بجلی غائب
مراکش میں تباہ کن زلزلے سے ہلاکتوں کی تعداد 2 ہزار 862 ہوگئی۔ غیرملکی خبررساں ادارے کے مطابق مراکش کے جنوب مغربی علاقے میں آنے والے زلزلے کی شدت 6.8 ریکارڈ کی گئی۔زلزلے کا مرکز مراکش کے شہر سے 75 کلومیٹر دور اٹلس پہاڑی سلسلہ تھا اور اس کی زیر زمین گہرائی 18.5 کلومیٹر ریکارڈ کی گئی۔
حکام کا کہنا ہے کہ تباہ کن زلزلے میں ہلاک ہونے والوں کی تعداد 2862 تک پہنچ گئی ہے جب کہ 2500 سے زائد افراد زخمی ہیں۔مقامی میڈیا کے مطابق زلزلے سے کئی علاقوں کی بجلی غائب ہے جب کہ یونیسکو کی جانب سے عالمی ثقافتی ورثہ قرار دی گئی تاریخی عمارتوں کو بھی نقصان پہنچا ہے۔
حکام کے مطابق زلزلے کے باعث عمارتیں ملبے کا ڈھیر بن گئیں۔ بجلی اور مواصلات کا نظام بری طرح متاثر ہوا ہے جبکہ زلزلے سے متاثرہ افراد کھلے آسمان تلے راتیں گزارنے پر مجبور ہیں۔
حکام کی جانب سے یہ بھی بتایا گیا کہ زلزلے کے نتیجے میں کئی عمارتیں تباہ ہوگئیں جب کہ درجنوں عمارتوں کو جزوی نقصان پہنچا۔ زلزلے سے متاثرہ علاقوں میں امدادی اور امدادی کارروائیاں جاری ہیں۔ اس زلزلے کو مراکش میں 1960 کے بعد کا سب سے مہلک زلزلہ کہا جاتا ہے جب اس زلزلے سے 12000 افراد ہلاک ہوئے تھے۔
