واٹس ایپ کی متبادل ایپ ’بیپ پاکستان‘ متعارف
وزارت انفارمیشن ٹیکنالوجی نے دنیا کی سب سے بڑی انسٹنٹ ایپلی کیشن واٹس ایپ کی متبادل ایپ ’بیپ پاکستان‘ متعارف کرادی۔ رپورٹ کے مطابق انفارمیشن ٹیکنالوجی کے وفاقی وزیر سید امین الحق نے ایپلی کیشن کو متعارف کرایا۔
مذکورہ ایپلی کیشن کو نیشنل انفارمیشن ٹیکنالوجی بورڈ (این آئی ٹی بی) بورڈ نے بنایا اور اسے ابتدائی طور پر وزارت کے اندر ہی استعمال کیا جائے گا۔
ایپلی کیشن کو متعارف کرائے جانے کی تقریب سے خطاب کرتے ہوئے امین الحق نے بتایا کہ ’بیپ پاکستان‘ کو ابتدائی طور پر وزارت انفارمیشن ٹیکنالوجی اور این آئی بی ٹی کے افسران استعمال کریں گے۔
وفاقی وزیر آئی ٹی و ٹیلی کمیونیکیشن سید امین الحق نے پاکستان کی پہلی کمیونیکیشن ایپلیکیشن 'بیپ پاکستان' کا افتتاح کر دیا ہے۔ اس حوالے سے تقریب انعقاد یہاں سوموار کو کیا گیا۔ اس موقع پر وفاقی وزیر آئی ٹی نے ای آفس کے جدید ویب ورژن کا بھی اجراء کر دیا۔#BeepPakistan #MOITT pic.twitter.com/XUACjg4LFN
— Ministry of IT & Telecom (@MoitOfficial) August 7, 2023
ان کے مطابق ایک ماہ بعد مذکورہ ایپلی کیشن کی آزمائش کو بڑھاکر تمام وفاقی سرکاری ملازمین تک پھیلایا جائے گا اور ہر ملازم کو ایپلی کیشن تک رسائی دی جائے گی۔
انہوں نے بتایا کہ سرکاری ملازمین ایک سال تک مذکورہ ایپلی کیشن کو استعمال کرتے رہیں گے، جس کے بعد اسے عام صارفین تک پھیلایا جائے گا۔
سید امین الحق نے ایپلی کیشن کی بعض سیکیورٹی خوبیاں بیان کرتے ہوئے دعویٰ کیا کہ ’بیپ پاکستان‘ محفوظ ایپ ہے، جس میں دستاویزات، تصاویر اور ویڈیوز کے لیک ہونے کا سوال ہی پیدا نہیں ہوتا اور یہ ایپلی کیشن کے ڈیٹا تک تیسرے فرد کی رسائی نہیں ہوگی۔انہوں نے ’بیپ پاکستان‘ کے فیچر بتاتے ہوئے کہا کہ اس میں آڈیو، ویڈیو کالز سمیت کانفرنس کالز بھی ہوں گی اور اس میں ’زوم‘ ایپلی کیشن جیسے فیچر بھی ہوں گے۔
