جنرل باجوہ محسن ہیں، احسان فراموشی نہ کی جائے، پرویز الہیٰ

وزیر اعلیٰ پنجاب چوہدری پرویز الہٰی کا کہنا ہے کہ جب خان صاحب جنرل باجوہ کے خلاف بات کر رہے تھے، تو مجھے بہت بُرا لگا۔پرویز الہٰی نے صحافیوں سے گفتگو کے دوران کہا کہ جنرل باجوہ کے خلاف  اب اگر بات کی گئی تو سب سے پہلے میں بولوں گا اور ان کی ساری پارٹی بولے گی۔

انہوں نے کہا کہ جنرل باجوہ ہمارے محسن ہیں، محسنوں کے خلاف بات نہیں کرنی چاہیے۔پرویز الہٰی کا کہنا ہے کہ جنرل باجوہ کے ان پر بہت احسانات ہیں، احسان فراموشی نہ کی جائے۔

واضح رہے کہ گزشتہ روز پاکستان تحریکِ انصاف (پی ٹی آئی) کے چیئرمین عمران خان نے 23 دسمبر کو پنجاب اور خیبر پختون خوا اسمبلیاں توڑنے کا اعلان کیا تھا۔

لاہور میں وزیرِ اعلیٰ پنجاب چوہدری پرویز الہٰی اور خیبر پختون خوا کے وزیرِ اعلیٰ محمود خان کے ہمراہ ویڈیو لنک کے ذریعے خطاب کرتے ہوئے عمران خان نے کہا تھا کہ ہم دو اسمبلیاں قربان کرتے ہیں۔

انہوں نے کہا تھا کہ ہم نے فیصلہ کیا ہے کہ اگلے جمعے کو دونوں اسمبلیاں توڑ دیں گے، قومی اسمبلی میں اسپیکر کے سامنے جا کر کہيں گے کہ استعفے قبول کرو۔