کینیڈا کی نائب وزیر خارجہ کی آرمی چیف جنرل قمر جاوید باجوہ سے ملاقات
آرمی چیف جنرل قمر جاوید باجوہ سے کینیڈا کی نائب وزیرخارجہ مارٹا مورگن نے ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق جنرل ہیڈکوارٹرز (جی ایچ کیو) راولپنڈی میں ہونے والی ملاقات میں مجموعی علاقائی صورتحال اور افغانستان میں انسانی ہمدردی کی بنیاد پر اقدامات میں تعاون پر تبادلہ خیال کیا گیا۔
آرمی چیف کا کہنا تھا کہ پاکستان دوطرفہ روابط کی روایت کو برقرار رکھنے کا خواہاں ہے، پاکستان کینیڈا کے ساتھ طویل المدتی اور کثیر المقاصد پائیدار تعلقات کا خواہاں ہے۔
آرمی چیف نے انسانی بحران سے بچنے کیلئے افغانستان پر عالمی اتحاد کی اشد ضرورت کا اعادہ کیا۔
آئی ایس پی آر کے مطابق کینیڈین نائب وزیر خارجہ نے افغانستان میں انخلا کے آپریشن، علاقائی استحکام میں پاکستان کے کردار کو سراہا اور پاکستان کے ساتھ ہر سطح پر سفارتی تعاون میں مزید بہتری کیلئے اپنا کردار ادا کرنے کا عہد کیا۔
