ملک میں گندم کی کوئی قلت نہیں، وفاقی وزیر رانا تنویر حسین

قومی غذائی تحفظ و تحقیق کے وزیر رانا تنویر حسین نے واضح طور پر کہا ہے کہ ملک میں گندم کی کوئی قلت نہیں ہے۔

اسلام آباد میں نیوز کانفرنس سے خطاب کرتے ہوئے انہوں نے کہا کہ گندم کی قیمتوں میں حالیہ اضافہ مصنوعی طور پر پیدا کیا گیا ہے۔ وزیرِ اعظم کی ہدایت پر تمام صوبوں کو اس مسئلے کو فوری طور پر حل کرنے اور اس حوالے سے مناسب اقدامات کرنے کی ہدایت کی گئی ہے۔

وفاقی وزیر نے کہا کہ زراعت پاکستان کی معیشت میں کلیدی اہمیت رکھتی ہے اور وزیرِ اعظم خود اس کی ترقی پر بھرپور توجہ دے رہے ہیں۔

انہوں نے پاکستان کے زرعی شعبے کی ترقی کے لیے جدید آلات اور تحقیق سے بھرپور استفادہ کرنے کی ضرورت پر زور دیا۔

انہوں نے کہا کہ حکومت نے کسانوں کی معاونت، گندم کی کاشت کی حوصلہ افزائی اور قیمتوں میں استحکام برقرار رکھنے کے لیے گندم کی امدادی قیمت چار ہزار پانچ سو روپے فی چالیس کلوگرام مقرر کی ہے۔