ملک بھر میں آج یومِ شہدائے پولیس منایا جا رہا ہے تاکہ فرض کی ادائیگی کے دوران جان کا نذرانہ پیش کرنے والے پولیس افسران اور اہلکاروں کو خراجِ عقیدت پیش کیا جا سکے اور ان کے اہلِ خانہ سے اظہارِ یکجہتی کیا جائے۔
اس موقع پر ملک بھر کے پولیس لائنز اور یادگاروں پر خصوصی تقریبات، گارڈ آف آنر اور پھولوں کی چادریں چڑھانے کی تقریبات کا انعقاد کیا جا رہا ہے۔
صدر مملکت آصف علی زرداری اور وزیراعظم محمد شہباز شریف نے اپنے الگ الگ پیغامات میں وطن کے امن و امان اور سلامتی کے لیے شہادت کا عظیم رتبہ پانے والے پاکستان پولیس کے بہادر افسران اور اہلکاروں کو زبردست خراجِ عقیدت پیش کیا۔
دونوں رہنماؤں نے کہا کہ شہدائے پولیس کی بے مثال بہادری، غیر متزلزل عزم اور قوم کی خدمت کے لیے دی گئی قربانیاں ہمیشہ پاکستانی عوام کے لیے باعثِ فخر رہیں گی اور انہیں ہمیشہ عزت و احترام کی نگاہ سے دیکھا جائے گا۔
صدر آصف علی زرداری نے اپنے پیغام میں کہا کہ پولیس فورس جرائم، دہشت گردی اور پرتشدد انتہا پسندی کے خلاف جنگ میں صفِ اول کا کردار ادا کر رہی ہے۔ انہوں نے اس عزم کا اظہار کیا کہ جدید تربیت، جدید ٹیکنالوجی اور بہتر وسائل کی فراہمی کے ذریعے پولیس اداروں کو مزید مضبوط اور مؤثر بنایا جائے گا تاکہ وہ اپنے فرائض مزید اعتماد اور پیشہ ورانہ انداز میں انجام دے سکیں۔
وزیراعظم محمد شہباز شریف نے اپنے پیغام میں کہا کہ شہدائے پولیس کے خاندانوں کی فلاح و بہبود اور ہر ممکن معاونت حکومت کی اولین ذمہ داری ہے۔ انہوں نے کہا کہ حکومت شہداء کے اہلِ خانہ کو معیاری تعلیم، بہترین طبی سہولیات اور دیگر فلاحی اقدامات کی فراہمی کے لیے مکمل طور پر پرعزم ہے۔
-
-
-
-
-
-
