سری لنکا ویمنز نے دوسرا ون ڈے جیت کر سیریز ایک، ایک سے برابر کر دی، فیصلہ کن میچ 28 جولائی کو ہوگا
سری لنکا ویمنز نے دوسرے ایک روزہ میچ میں پاکستان ویمنز کو آٹھ وکٹوں سے شکست دے کر تین میچوں پر مشتمل آئی سی سی ویمنز چیمپئن شپ سیریز ایک، ایک سے برابر کر دی۔ اب دونوں ٹیموں کے درمیان سیریز کا فیصلہ کن مقابلہ منگل، 28 جولائی کو کھیلا جائے گا۔
پاکستان نے پہلے بیٹنگ کرتے ہوئے مقررہ 50 اوورز میں 5 وکٹوں کے نقصان پر 273 رنز بنائے۔ سدرہ امین نے شاندار بیٹنگ کا مظاہرہ کرتے ہوئے ناقابل شکست 100 رنز کی اننگز کھیلی، جو ان کے ون ڈے کیریئر کی ساتویں سنچری ہے۔ عائشہ ظفر 49، منیبہ علی 45، گل فیروزہ 27 اور کپتان فاطمہ ثناء 25 رنز بنا کر نمایاں رہیں۔
پاکستان کی اننگز میں سدرہ امین نے مختلف شراکت داریوں کے ذریعے ٹیم کو مضبوط مجموعے تک پہنچانے میں کلیدی کردار ادا کیا۔ انہوں نے عائشہ ظفر اور منیبہ علی کے ساتھ نصف سنچری کی شراکتیں قائم کیں، جبکہ فاطمہ ثناء کے ساتھ تیز رفتار رنز جوڑ کر ٹیم کا اسکور 273 تک پہنچایا۔
جواب میں سری لنکا نے صرف دو وکٹوں کے نقصان پر 46.5 اوورز میں ہدف حاصل کر لیا۔ وشمی گونارتنے نے 123 جبکہ ہرشیتھا سماراوکراما نے ناقابل شکست 100 رنز کی عمدہ اننگز کھیلیں۔ دونوں بلے بازوں نے دوسری وکٹ کے لیے 203 رنز کی ریکارڈ شراکت قائم کی، جو سری لنکا ویمنز کی ون ڈے کرکٹ کی تاریخ کی سب سے بڑی شراکت ہے۔
پاکستان کو ابتدائی کامیابی اس وقت ملی جب کپتان فاطمہ ثناء نے سری لنکن کپتان چماری اتھاپاتھو کو صرف ایک رن پر آؤٹ کر دیا، تاہم اس کے بعد وشمی گونارتنے اور ہرشیتھا سماراوکراما نے ذمہ دارانہ بیٹنگ کرتے ہوئے میچ کا رخ اپنی ٹیم کے حق میں موڑ دیا۔
وشمی گونارتنے نے 123 گیندوں پر 123 رنز کی اننگز میں 11 چوکے اور ایک چھکا لگایا، جبکہ ہرشیتھا سماراوکراما نے 119 گیندوں پر ناقابل شکست 100 رنز بنائے، جس میں 9 چوکے شامل تھے۔ بعد ازاں کاویشا دلہاری نے ناقابل شکست 40 رنز بنا کر سری لنکا کو فتح دلوا دی۔
پاکستان کی جانب سے فاطمہ ثناء اور نشرا سندھو نے ایک، ایک وکٹ حاصل کی، جبکہ سری لنکا کی جانب سے چیتھانا ویمکتھی، انوکا راناویرا، کاویشا دلہاری اور چماری اتھاپاتھو نے ایک، ایک کھلاڑی کو آؤٹ کیا۔
میچ میں شاندار سنچری بنانے پر وشمی گونارتنے کو پلیئر آف دی میچ قرار دیا گیا۔
