پاکستان ایئر فورس نے مقامی طور پر تیار کردہ تیمور ویپن سسٹم کا کامیاب فلائٹ ٹیسٹ انجام دے دیا ہے، جو قومی ایرو اسپیس اور دفاعی صلاحیتوں میں نمایاں پیش رفت کا مظہر ہے۔
تیمور ایک ایئر لانچڈ کروز میزائل ہے جو 600 کلومیٹر تک کے فاصلے پر زمینی اور بحری اہداف کو انتہائی درستگی کے ساتھ نشانہ بنانے کی صلاحیت رکھتا ہے اور روایتی وار ہیڈ سے لیس ہے۔
جدید ترین نیویگیشن اور گائیڈنس سسٹم سے آراستہ تیمور کو انتہائی کم بلندی پر پرواز کے لیے ڈیزائن کیا گیا ہے، جس کی بدولت یہ دشمن کے فضائی اور میزائل دفاعی نظام سے مؤثر انداز میں بچ نکلنے کی صلاحیت رکھتا ہے۔
اس کی انتہائی درست حملے کی صلاحیت پاکستان ایئر فورس کی روایتی دفاعی قوت اور آپریشنل لچک میں نمایاں اضافہ کرتی ہے، جس سے ملک کے مجموعی دفاعی نظام کو مزید مضبوطی حاصل ہوتی ہے۔
تیمور ویپن سسٹم کا کامیاب تجربہ پاکستان کی دفاعی صنعت میں حاصل ہونے والی تکنیکی پختگی، جدت اور خود انحصاری کا عملی ثبوت ہے۔
اس تجربے کا مشاہدہ پاکستان کی مسلح افواج کے اعلیٰ افسران کے علاوہ ان ممتاز سائنس دانوں اور انجینئرز نے بھی کیا جنہوں نے اس جدید ہتھیار کی تیاری میں کلیدی کردار ادا کیا۔
پاک فضائیہ کے سربراہ ایئر چیف مارشل ظہیر احمد بابر سدھو نے اس شاندار کامیابی پر سائنس دانوں، انجینئرز اور پوری پی اے ایف ٹیم کو دلی مبارکباد دی۔ انہوں نے ان کی پیشہ ورانہ مہارت، لگن اور قومی دفاع کے استحکام کے لیے غیر متزلزل عزم کو سراہا۔
ایئر چیف نے اس عزم کا اعادہ کیا کہ اس نوعیت کی کامیابیاں بدلتے ہوئے علاقائی سکیورٹی ماحول میں ٹیکنالوجی میں خود کفالت اور قابلِ اعتماد روایتی دفاعی صلاحیت برقرار رکھنے کے قومی عزم کی عکاس ہیں۔ تیمور ویپن سسٹم کا کامیاب تجربہ پاکستان ایئر فورس کی آپریشنل تیاری، تکنیکی برتری اور قومی سلامتی کے اہداف کے حصول کی مسلسل کوششوں کا ثبوت ہے۔
-
-
-
-
-
-
