گورنمنٹ ایلیمنٹری سکول ظفر آباد رنگپور بگھور میں سرکاری سکولوں کے سالانہ سپورٹس مقابلوں کا آغاز
محکمہء تعلیم ضلع خوشاب کی ہدایت پر گورنمنٹ ایلیمنٹری سکول ظفر آباد رنگپور بگھور میں سرکاری سکولوں کے سالانہ سپورٹس مقابلوں کا آغاز کر دیا گیا ہے ۔ اسسٹنٹ ایجوکیشن آفیسر رنگپور بگھور ملک محمد امتیاز نسیم نے باقاعدہ سپورٹس گالا کا افتتاح کیا۔ ہیڈ ماسٹرز ملک عابد اقبال اور ملک ریاض حسین بگھور بھی اس موقع پر موجود تھے۔
سالانہ سپورٹس مقابلوں کی نگرانی انچارج سپورٹس ملک محمد عمران بھروکہ کر رہے ہیں۔ ان سپورٹس مقابلوں میں والی بال، لانگ جمپ ،ہائی جمپ، 100 میٹر دوڑ، کرکٹ ، رسہ کشی ، بوری دوڑ اور دیگر مقابلہ جات شامل ہیں۔ سالانہ سپورٹس مقابلوں میں مختلف سرکاری سکولوں کے طلباء بھرپور شرکت کر رہے ہیں اور ان کا جوش و جذبہ دیدنی ہے۔
اسسٹنٹ ایجوکیشن آفیسر ملک محمد امتیاز نسیم کے مطابق حکومت پنجاب سرکاری سکولوں میں نصابی سرگرمیوں کے ساتھ ساتھ ہم نصابی سرگرمیوں پر بھی بھرپور توجہ دے رہی ہے اور سالانہ سپورٹس مقابلوں کا انعقاد اس سلسلے کی ایک کڑی ہے تاکہ بچوں کی خوابیدہ صلاحیتوں کو جلا مل سکے ۔
