ڈسٹرکٹ اینڈ سیشن جج جناب ملک مشتاق الٰہی بنگی مدت ملازمت پوری ہونے پر ریٹائر
فخر خوشاب، ڈسٹرکٹ اینڈ سیشن جج جناب ملک مشتاق الٰہی بنگی مدت ملازمت پوری ہونے پر ریٹائرڈ ہوگئے ہیں۔ آپ ضلع خوشاب کی تحصیل نور پور تھل کے گاؤں پیلو وینس میں پیدا ہوئے، انہوں نے ایک شاندار تعلیمی سفر طے کیا، پنجاب یونیورسٹی سے سیاسیات اور تاریخ میں ایم اے، ایل ایل بی، ڈی ایل ایل، اور ایل ایل ایم پاس کیا۔
جناب ملک مشتاق الہی بنگی نے اپنے کیریئر کا آغاز بطور وکیل کیا اور نور پور تھل میں خدمت کمیٹی کے چیئرمین اور نور پور تھل بار ایسوسی ایشن کے صدر کے طور پر خدمات انجام دے کر اپنا بھرپور کردار ادا کیا۔
2002ء میں، انہوں نے پاکستان مسلم لیگ (ن) کے امیدوار کے طور پر صوبائی اسمبلی کے لیے بھی انتخاب لڑا۔2006 میں، وہ ایڈیشنل ڈسٹرکٹ اینڈ سیشن جج کے طور پر تعینات ہوئے، پنجاب کے مختلف اضلاع بشمول چکوال، سرگودھا، میانوالی، لاہور، حاصل پور/بہاولپور، بھلوال، عارف والا/پاکپتن، ٹوبہ ٹیک سنگھ، بھکر، پپلاں/میانوالی، اور کوٹمومین میں تعینات رہے۔
2015ء میں انہیں ڈسٹرکٹ اینڈ سیشن جج کے عہدے پر ترقی دی گئی۔موصوف اپنے پورے کیرئیر کے دوران راولپنڈی، گوجرانوالہ اور لاہور ڈویژنز میں انسداد بدعنوانی کے خصوصی جج سمیت دیگر اہم عہدوں پر فائز رہے۔ انہوں نے لاہور میں احتساب عدالت-1 کے جج اور ڈیرہ غازی خان ڈویژن میں انسداد دہشت گردی کی عدالت کے جج کے طور پر بھی خدمات انجام دیں۔ مزید برآں، انہوں نے بھکر اور حافظ آباد میں بطور ڈسٹرکٹ اینڈ سیشن جج اپنی ذمہ داریاں پوری کیں۔ وہ فیصل آباد ڈویژن میں پنجاب لیبر کورٹ کے پریزائیڈنگ آفیسر کے طور پر خدمات انجام دے رہے تھے۔ آج گریڈ 22 میں ان کی ریٹائرمنٹ عدلیہ میں ایک غیر معمولی کیریئر کے اختتام کی نشاندہی کرتی ہے۔
