فرح گوگی کا پی ٹی آئی سے کوئی تعلق نہیں،کرپشن کی تو انہیں سزا ملنی چاہیے، زلفی بخاری
عثمان بزدار کی غلط چوائس کے بارے میں چیئرمین پی ٹی آئی کو بھی احساس ہو گیا تھا، بعد میں ان کو ہٹانا مناسب نہیں تھا
پاکستان تحریک انصاف کے رہنما زلفی بخاری نے کہا ہے کہ فرح گوگی کا پی ٹی آئی سے کوئی تعلق نہیں، انہوں نے کرپشن کی ہے تو انہیں سخت سزا ملنی چاہیے، عثمان بزدار کی غلط چوائس کے بارے میں چیئرمین پی ٹی آئی کو بھی احساس ہو گیا تھا،میرے خلاف مقدمات بنانے والے چیئرمین پی ٹی آئی کے چند قریبی لوگ شامل تھے۔
لندن میں میڈیا سے گفتگو کرئے ہوئے زلفی بخاری نے کہا کہ عثمان بزدار کی غلط چوائس کے بارے میں چیئرمین پی ٹی آئی کو بھی احساس ہو گیا تھا، بعد میں ان کو ہٹانا مناسب نہیں تھا، چیئرمین پی ٹی آئی کے چند قریبی لوگ میرے خلاف مقدمات بنانے والوں میں شامل تھے، مجھ پر مقدمات بنانے والا ایک وعدہ معاف گواہ بن گیا اور دوسرا ملک چھوڑ کر بھاگ گیا۔
انہوں نے کہا کہ 9 مئی کے واقعات کی پوری پی ٹی آئی نے مذمت کی تھی، جناح ہائوس پر حملے کی سخت مذمت کی، تاریخ میں پہلی مرتبہ میڈیا سخت ترین دور سے گزر رہا ہے، پاکستان میں زبردستی سیاست چھوڑنے والوں کا ووٹ بینک بھی ختم ہو گیا۔
پی ٹی آئی رہنما نے کہا کہ میرے جیل میں جانے سے فائدہ نہیں ہو گا، وقت آنے پر ہم میدان میں ہوں گے، نگران وزیرِ اعظم کی حیثیت کٹھ پتلی سے زیادہ نہیں، 50 فیصد بھی پلیئنگ فیلڈ ملی تو الیکشن جیت جائیں گے۔زلفی بخاری نے کہا کہ سپریم کورٹ سے انصاف کی امید ہے، بر وقت انتخابات کے لیے تمام سیاسی جماعتوں کو متحد ہونا چاہیے، پاکستان میں انتخابات میں دھاندلی کے لئے کام شروع ہو چکا، پاکستان کی معاشی حالت تباہی کی طرف جا رہی ہے، شفاف انتخابات ہی ملک میں معاشی استحکام لائیں گے۔
انہوں نے کہا کہ رنگ روڈ سکینڈل میرے خلاف ایک سازش تھی، ثبوت نہ ہونے کے سبب پیش رفت نہیں ہوئی، عثمان بزدار کو وزیرِ اعلیٰ بنانا ہی نہیں چاہیے تھا، 190 ملین پائونڈ کسی کے جیب میں نہیں سپریم کورٹ کے اکائونٹ میں ہیں۔
