نگران وزیر خارجہ کل سے چین کا دو روزہ دورہ کرینگے

نگراں وزیر خارجہ جلیل عباس جیلانی اس ماہ کی 4 تاریخ سے تبت کے خود مختار علاقے نینگچی میں منعقد ہونے والے تیسرے ٹرانس ہمالیہ فورم برائے بین الاقوامی تعاون میں شرکت کے لیے کل بدھ سے چین کا دو روزہ سرکاری دورہ کریں گے۔

دفتر خارجہ کے مطابق وزیر خارجہ اپنے چینی ہم منصب وانگ یی کی خصوصی دعوت پر چین کا دورہ کر رہے ہیں۔

ٹرانس ہمالیہ فورم کا آغاز 2018 میں علاقائی ممالک کے درمیان جغرافیائی رابطے، ماحولیاتی تحفظ، ماحولیاتی تحفظ، اور ثقافتی روابط کو بڑھانے سمیت متنوع موضوعات پر عملی تعاون کو گہرا کرنے کے لیے کیا گیا تھا۔ فورم کی آخری ملاقات 2019 میں ہوئی تھی۔

اس سال کے فورم کا تھیم “ماحولیاتی تہذیب اور ماحولیاتی تحفظ” ہے۔

تبت میں اپنے قیام کے دوران وزیر خارجہ ٹرانس ہمالیہ فورم کی افتتاحی تقریب سے خطاب کریں گے۔

وہ منگولیا کے نائب وزیراعظم، چین کے وزیر خارجہ اور افغانستان کے عبوری وزیر خارجہ سمیت کئی علاقائی شخصیات سے بھی ملاقاتیں کریں گے۔