ایزی پیسہ ڈیجیٹل بینک نے سال 2025 کی پہلی ششماہی میں 3.64 ارب روپے پری ٹیکس منافع کمایا
ایزی پیسہ ڈیجیٹل بینک کے بورڈ آف ڈائریکٹرز نے 30 جون 2025 کو ختم ہونے والی ششماہی کے مالیاتی نتائج کی منظوری دی۔ بینک نے اس عرصے میں 3.64 ارب روپے پری ٹیکس منافع کمایا ، جو گزشتہ سال کے اسی عرصے میں 2.61 ارب روپے تھا۔ اس طرح منافع میں 39.4 فیصد اضافہ ہوا۔
یہ کامیابی زیادہ مارک اپ آمدن اور ڈیجیٹل لینڈنگ و پیمنٹس سے حاصل ہونے والی فیسوں کی مضبوط آمدن کے باعث ممکن ہوئی، حالانکہ اس دوران مہنگائی میں کمی کے مطابق اسٹیٹ بینک کا ڈسکاؤنٹ ریٹ 20 فیصد سے گھٹ کر 11 فیصد ہو گیا۔ نیٹ مارک اپ آمدن میں 15.6 فیصد اضافہ ہوا، جس کی بنیاد ڈیجیٹل قرضوں کی بڑھتی ہوئی سہولت تھی۔ اسی دوران نان مارک اپ آمدن میں 60.5 فیصد اضافہ دیکھنے میں آیا، جو زیادہ ٹرانزیکشن والیومز (خاص طور پر کیش ڈپازٹس اور ودڈرالز)، لوڈ و بنڈل پراڈکٹس سے کمائی، کارپوریٹ ڈسبرسمنٹس و کلیکشن پر کمیشنز اور انشورنس پراڈکٹس سے حاصل ہوا۔
آپریٹنگ اخراجات میں 9.6 فیصد اضافہ ہوا، جو ٹیکنالوجی، افرادی قوت اور صارفین کے حصول پر سرمایہ کاری کی وجہ سے ہے، تاہم معاوضوں کے اخراجات میں کچھ کمی نے اس کو جزوی طور پر متوازن رکھا۔ لاگت سے آمدن کا تناسب بہتر ہو کر گزشتہ سال کے 80.5 فیصد سے 66.9 فیصد تک آگیا۔
بینک کا ڈیجیٹل ایکو سسٹم مزید مستحکم ہوا، اور ماہانہ فعال صارفین کی تعداد 1.82 کروڑ تک پہنچ گئی۔ صارفین کے ڈپازٹس 94.7 ارب روپے رہے، جو جون 2024 کے مقابلے میں 41.3 فیصد زیادہ ہیں۔ یہ اضافہ صارفین کے اعتماد کا مظہر ہے، جو ایزی پیسہ کے ڈیجیٹل ریٹیل بینک میں منتقلی کے بعد بڑھا ہے۔
بینک کا CASA ریٹ 98.1 فیصد رہا، جب کہ ڈپازٹس کی لاگت انڈسٹری میں سب سے کم 1.57 فیصد پر ہے۔
کل ایڈوانسز 27.7 ارب روپے رہے، اور لون ٹو ڈپازٹ ریشو 25 فیصد رہا۔ نان پرفارمنگ لونز (NPLs) 16.1 فیصد رپورٹ ہوئے، جن کا کوریج ریشو 91.4 فیصد ہے۔ بینک کی ایکویٹی 16.8 ارب روپے رہی جبکہ کیپیٹل ایڈی کوئسی ریشو (CAR) 20.52 فیصد پر مضبوط ہے۔
ایزی پیسہ ڈیجیٹل بینک کے صدر و سی ای او جہانزیب خان نے کہا”:سال 2025 کی پہلی ششماہی میں شاندار منافع پاکستان کے ڈیجیٹل بینکنگ سیکٹر میں جدت لانے کے ہمارے عزم کو ظاہر کرتی ہے۔ ہم آسان اور سہل ڈیجیٹل مالی خدمات کی فراہمی کے لیے پرعزم ہیں۔ مختلف جدید مصنوعات اور خدمات کے ساتھ، اور مزید آنے والی سہولتوں کے ذریعے، ایزی پیسہ پاکستان کی ڈیجیٹل بینکنگ کی قیادت کرے گا۔ میں اپنے پارٹنرز، بورڈ ممبران، انڈسٹری اسٹیک ہولڈرز اور اسٹیٹ بینک آف پاکستان کا شکریہ ادا کرتا ہوں، جو اس کیش لیس اکانومی کے سفر میں ہمارے ساتھ ہیں۔”
چیف فنانشل آفیسر امین سکھیا نی نے کہا: "ایزی پیسہ ڈیجیٹل بینک اپنی ترقی کے سفر کو مزید تیز کرنے کی بھرپور صلاحیت رکھتا ہے۔ ہم اپنی پروڈکٹ لائن کو وسعت دے رہے ہیں، جن میں فارن ایکسچینج، اسلامی مصنوعات، کریڈٹ کارڈز، ریمٹینسز اورBuy Now Pay Later کی سہولت شامل ہے۔ ہم حکومت کے ڈیجیٹل کیش لیس اقدام کے تحت مرچنٹس کے دائرہ کار کو بڑھا رہے ہیں اور انشورنس مارکیٹ پلیس کو بھی مضبوط بنا رہے ہیں تاکہ اپنے صارفین کو مزید قدر فراہم کرسکیں۔”
اپنے 55 ملین سے زائد رجسٹرڈ صارفین کے ساتھ اور بطور ملک کا پہلا ڈیجیٹل بینک جو کمرشل آپریشنز شروع کر چکا ہے، ایزی پیسہ اسٹیٹ بینک آف پاکستان کے وژن کے مطابق شمولیتی معیشت کے فروغ کے لیے پرعزم ہے۔ ہم نہ صرف اپنے موجودہ صارفین کے لیے بلکہ ان لاکھوں افراد کے لیے بھی اپنی خدمات کو بڑھانے کے لیے تیار ہیں، جو اب بھی بینکنگ سہولت سے محروم ہیں۔
