پاک فوج نے بابوسر میں پھنسے سیاحوں کے لیے ریسکیو آپریشن شروع کر دیا
بابوسر اور قراقرم ہائی وے پر حالیہ سیلاب کے باعث پاکستانی فوج نے پھنسے ہوئے سیاحوں اور مسافروں کے لیے ریسکیو آپریشن شروع کیا۔فوج کے ہیلی کاپٹروں کے ذریعے سیاحوں اور مسافروں کو محفوظ مقامات پر منتقل کر دیا گیا ہے۔لوگوں کو محفوظ مقامات پر پہنچانے کے لیے اب تک 15 ہیلی کاپٹر پروازیں کی جا چکی ہیں۔پاک فوج اور گلگت بلتستان سکاؤٹس کی ٹیمیں متاثرہ افراد کو خوراک اور ضروری سامان پہنچا رہی ہیں۔زخمیوں کو فوری طبی امداد بھی فراہم کی جا رہی ہے۔روڈ کلیئرنس کی کوششیں جاری ہیں، مشینری اور اہلکار راستوں کی بحالی کے لیے مسلسل کام کر رہے ہیں۔بابوسر اور قراقرم ہائی وے پر رکاوٹیں ہٹائی جا رہی ہیں۔
لاپتہ افراد کی تلاش کے لیے سرچ اور ریسکیو ٹیمیں روانہ کر دی گئی ہیں۔پاک فوج نے مختلف مقامات پر لینڈ سلائیڈنگ سے متاثرہ اسکردو دیوسائی روڈ پر ریسکیو آپریشن بھی کیا۔رات بھر کی انتھک کوششوں کے بعد پاک فوج کی انجینئرنگ ٹیموں نے بھاری مشینری کا استعمال کرتے ہوئے اسکردو سے سدپارہ ماؤنٹینیئرنگ اسکول اور دیوسائی سے سدپارہ گاؤں تک سڑک کو مکمل طور پر صاف کر دیا ہے۔تمام مسدود راستوں کو دوبارہ کھول دیا گیا ہے اور پھنسے ہوئے افراد اور گاڑیوں کو بحفاظت نکال لیا گیا ہے۔ٹریفک دوبارہ شروع ہو گئی ہے اور اب آسانی سے رواں دواں ہے۔کسی بھی ممکنہ ہنگامی صورتحال کا فوری جواب دینے کے لیے علاقے میں فوج کے دستے تعینات ہیں۔مقامی باشندوں اور سیاحوں نے پاک فوج کی بروقت کارروائی اور پیشہ ورانہ صلاحیتوں کو سراہا۔
